პარლამენტის თავმჯდომარე, არჩილ თალაკვაძე ამერიკელი კონგრესმენების კრიტიკულ წერილს ეხმაურება და ამბობს, რომ მათ მიერ გაჟღერებული ფაქტები ვერ გადაფარავს "საქართველოს ხელშესახებ პროგრესს". ამის შესახებ არჩილ თალაკვაძემ დღეს, 17 დეკემბერს ელჩების კონფერენციაზე ისაუბრა.

"საქართველოს აქვს ხელშესახები პროგრესი. მხოლოდ იმიტომ, რომ პროპორციული არჩევნების თარიღის გადმოწევა ვერ მოხერხდა და პარლამენტმა იმაზე 2-ით მეტი მოსამართლე დაამტკიცა, რა რჩევაც მისცა ვენეციის კომისიამ, ამ პროგრესის გადაფარვა ვერ მოხდება", — უთხრა პარლამენტის თავმჯდომარემ ჟურნალისტებს. მისივე თქმით, რომ საპარლამენტო დელეგაცია ვაშინგტონში უკვე ჩავიდა, რათა "ამომწურავი ინფორმაცია" მიაწოდონ ამერიკელებს.

გუშინ, 16 დეკემბერს კონგრესმენებმა ადამ კინზინგერმა და ჯერალდ ე. კონოლმა საქართველოს პრემიერ-მინისტრს, გიორგი გახარიას წერილით მიმართეს. მათ პრემიერი პროპორციულ სისტემაზე გადასვლის დაპირების შეუსრულებლობის გამო გააკრიტიკეს. მათივე წერილში აღნიშნულია, რომ გასაპროტესტებლად ქუჩაში გამოსულ ხალხს "მოძალადე ბოროტმოქმედები დაუპირისპირეს".