ნარკოდანაშაულის ბრალდებით დაკავებულ ბერს პატიმრობა შეეფარდა. როგოც პროკურორი აცხადებს, ზუგდიდის რაიონულმა სასამართლომ ბრალდების მხარის პოზიცია სრულად გაიზიარა.

დაკავებული ბერის ადვოკატი კი აცხადებს, რომ უფრო მსუბუქი აღკვეთის ღონისძიების საფუძვლებიც არსებობდა. მისივე თქმით, ბრალდებულს რამდენიმე სასულიერო პირი თავდებში ჩაუდგა.

"პირველი შემთხვევაა ამ ადამიანის ცხოვრებაში მსგავსი რამ. აბსოლუტურად სუფთა წარსული აქვს და მისაბაძი პიროვნებაა", — აღნიშნავს ადვოკატი.

ათონის მთაზე მოღვაწე ქართველი ბერი ზუგდიდში ნარკოდანაშაულის ბრალდებით 5 დეკემბერს დააკავეს. ამ საქმეზე კიდევ ერთი პირია დაკავებული.

გამოძიება სისხლის სამართლის კოდექსის 260-ე მუხლით მესამე ნაწილის "ბ" ქვეპუნქტითა და მეექვსე ნაწილის "ა" ქვეპუნქტით მიმდინარეობს, რაც გულისხმობს განსაკუთრებით დიდი ოდენობის ნარკოტიკული საშუალების უკანონო შეძენა-შენახვას წინასწარ შეთანხმებული ჯგუფის მიერ.