შინაგან საქმეთა სამინისტრომ თბილისში 24 ბინის გაქურდვის ბრალდებით 1984 და 1981 წლებში დაბადებული ორი პირი დააკავა. როგორც სამინისტროს განცხადებაშია აღნიშნული, ორივე დაკავებული ბრალს აღიარებს.

უწყების ინფორმაციით, სამართალდამცველებმა ორივე ბრალდებული დიდ დიღომში იმ დროს დააკავეს, როდესაც ისინი ვეფხისტყაოსნის ქუჩაზე მდებარე ერთ-ერთ საცხოვრებელ კორპუსში გაქურდული 8 ბინიდან მოპარულ ნივთებს ავტომანქანაში ტვირთავდნენ. მათივე თქმით, პოლიციამ შემთხვევის ადგილიდან ნივთმტკიცებად ამოიღო ერთ-ერთი ბრალდებულის რენჯ როვერის ავტომანქანა და ნაქურდალი ნივთები. დაკავებულების პირადი ჩხრეკისას, ასევე, ამოღებულია კარის გასაღები ხელსაწყოები.

გამოძიების განცხადებით, ბოლო სამი თვის განმავლობაში ამ პირებმა თბილისის სხვადასხვა უბანში 24 ბინა გაქურდეს, მოპარული ნივთების ნაწილს კი თავიანთ საცხოვრებელ სახლებში ინახავდნენ.

წინასწარი შეთანხმებით ჯგუფის მიერ ბინაში უკანონო შეღწევით ჩადენილ ქურდობის საქმეზე გამოძიება საქართველოს სისხლის სამართლის კოდექსის 177-ე მუხლის მე-3 ნაწილის "ა" და "გ" ქვეპუნქტებით მიმდინარეობს. დანაშაული 3-დან 7 წლამდე ვადით თავისუფლების აღკვეთას ითვალისწინებს.