2020 წელს ბევრად უფრო ხშირად შეგხვდებათ ლურჯი ფერი, ვიდრე წელს. Pantone-მა კლასიკური ლურჯი მომავალი წლის ფერად დაასახელა.

"ეს არის ფერი, რომელიც გვაფიქრებს, რა მოხდება მომავალში", - თქვა ლორი პრესმენმა, პანტონის ფერების ინსტიტუტის ვიცე-პრეზიდენტმა.

კლასიკური ლურჯი საღამოს ცასაც მოგაგონებთ, საღამო კი დღის ის პერიოდია, რომელიც უნებურად გვიბიძგებს შემდეგი დღის დაგეგმვისაკენ.

Pantone-ის განცხადებით, მსოფლიო არასტაბილურობის შეგრძნებითაა მოცული (გადახედეთ აშშ-ს, ბრიტანეთს, ჰონგ-კონგს, სირიას და სხვა უამრავ ქვეყანას), ლურჯს კი შეუძლია, რომ სტაბილურობისა და თავდაჯერებულობის შეგრძნება მოჰგვაროს ადამიანებს.

უკვე 20 წელზე მეტია, რაც Pantone წლის ფერს ასახელებს. 1963 წელს ორგანიზაციამ ფერების საკუთარი სისტემა შექმნა, რომელიც სხვადასხვა ინდუსტრიაში გამოიყენება, მაგალითად, ბეჭდვაში, გრაფიკულ დიზაინში და მოდაში.

როგორ ითარგმნება ლურჯი სუნში, გემოში, ხმაში და შეგრძნებაში?

ფოტო ღონისძიებიდან

2020 წლის მთავარი ფერის აღქმა მხედველობის გარდა, სხვანაირადაც შეგიძლიათ. Pantone-მა მულტისენსორული გამოცდილება შექმნა, რომელიც სტუმრებმა მანჰეტენში ფერის დასახელების ღონისძიებაზე იხილეს.

ჰაერში "კლასიკურად ლურჯი" სურნელი ტრიალებდა, შენობაში კი "ლურჯი" მუსიკა ისმოდა. სტუმრები ლურჯ კოქტეილს სვამდნენ.

თუ გაინტერესებთ, დაახლოებით რა გემო და სუნი აქვს ლურჯს: გაიხსენეთ სუნი, რომელიც ზღვისა და სველი მიწის კომბინაციას აქვს, გემო - ლურჯი მოცვის სიროპი, ტექსტურა - ხავედრის ახალთახალი დივანი, ხმა - წყალქვეშა, არაამქვეყნიური ხმები.

2019 წლის ფერი მარჯნისფერია.