თერთმეტკაციან საინიციატივო ჯგუფს, რომელიც სრულად მაჟორიტარულ სისტემაზე გადასავლას ემხრობა, ორპალატიანი პარლამენტის შექმნაც სურს. საინიციატოვო ჯგუფის საკონსტიტუციო ცვლილებების პროექტით, ორივე პალატა მაჟორიტარული წესით უნდა აირჩეს.

პროექტის მიხედვით, წარმომადგენლობის ახალი ფორმები შეიქმნება: ქვედა პალატა —რესპუბლიკის საბჭო და ზედა პალატა — სენატი. რესპუბლიკის საბჭო შედგება ოთხი წლის ვადით ერთმანდატიან საარჩევნო ოლქებში მაჟორიტარული სისტემით არჩეული 77 რესპუბლიკის საბჭოს წევრისგან. სენატი შედგება ხუთი წლის ვადით ერთმანდატიან საარჩევნო ოლქებში მაჟორიტარული სისტემით არჩეული სენატის 73 წევრისგან.

სენატი ერთმანდატიან მაჟორიტარულ საარჩევნო ოლქებში აირჩევა. სენატის თითო წევრი წარმოადგენს ერთ ან რამდენიმე მუნიციპალიტეტს. ხოლო თბილისში არანაკლებ 5 ერთმანდატიანი მაჟორიტარული საარჩევენო ოლქი იქნება.

ამასთან, ქვედა პალატის წევრი შესაძლოა გახდეს საქართველოს მოქალაქე 25 წლის ასაკიდან, სენატორი — 40 წლიდან.

როგორც საინიციატივო ჯგუფის ერთ-ერთი წევრი, დიმიტრი ხუნდაძე ამბობს, ქართული ოცნების გუნდში აზრთა სხვადასხვაობის მიუხედავად, ამ საკითხზე პრინციპული დამოკიდებულება აქვთ.

"ეს იქნება ამერიკული საარჩევნო სისტემის მოდელი, ორპალატიანი. ეს მისცემს საშუალებას, რომ თითოეულ მოქალაქეს და საზოგადოებას ჰქონდეს პირდაპირი კავშირი ხელისუფლების დაკომპლექტებასთან. ეს იქნება ძირითადი წყარო", — განმარტა ხუნდაძემ.

ხუნდაძეს არ დაუკონკრეტებია, როდის უნდა გადავიდეს ქვეყანა სრულად მაჟორიტარულ სისტემაზე. თუმცა, ამბობს, რომ მისი ინიციატივა 2020 წლის საპარლამენტო არჩევნების დროს არ ამოქმედდება. კონსტიტუციით კი 2024 წლის საპარლამენტო არჩევნები პროპორციული სისტემით უნდა ჩატარდეს. ამასთან, როგორც საქართველოს კონსტიტუციაში წერია, ორპალატიანი პარლამენტი ქვეყანას ტერიტორიული მთლიანობის აღდგენის შემდეგ ექნება.

ორპალატიანი პარლამენტის იდეა მოსწონს კონსტიტუციონალისტ ვახუშტი მენადბეს. თუმცა, როგორც On.ge-ს უთხრა, საარჩევნო სისტემა მეტად პროპორციული უნდა გახდეს და ორპალატიან პარლამენტში ერთი პალატა მაინც უნდა იყოს სრულად პროროპორციული წესით არჩეული.

"ორივე პალატას მაჟორიტარულად აკომპლექტებს. რაც, ჩემი აზრით, ძალიან დიდი პრობლემა იქნება. მითუმეტეს იმის გათვალისწინებით, რომ თუ ამერიკული მოდელის კოპირებაზეა საუბარი, ამერიკულ მოდელში ზედა პალატას ნახევრად სუვერენული წარმონაქმნები, შტატები აკომპლექტებენ. ჩვენ უნიტარული ქვეყანა ვართ და ამ მიმართულებითაც იგეგმება რამე ცვლილებები? ჩვენ უნდა წავიდეთ მეტი პროპორციულისკენ და სულ ცოტა ქვედა პალატა უნდა იყოს პროპორციული", — განაცხადა ვახუშტი მენაბდემ.

თერთმეტკაციან საინიციატივო ჯგუფში ის დეპუტატები შედიან, რომლებმაც პროპორციულ საარჩევნო სისტემას მხარი არ დაუჭირეს. დეპუტატები სრულად მაჟორიტარულ საარჩევნო სისტემაზე გადასვლის საკონსტიტუციო ცვლილებების ინიცირების მიზნით 200 000 ხელმოწერის შეგროვებას აპირებენ. მათ უკვე მიმართეს პარლამენტს, რომ საინიციატივო ჯგუფი ბიუროს უახლოეს სხდომაზე დაარეგისტრირონ.