საკონსტიტუციო სასამართლოს მოქმედი თავმჯდომარე, ზაზა თავაძე უზენაესი სასამართლოს მოსამართლეობის კონკურსიდან კანდიდატურას ხსნის. შესაბამისი წერილით მან პარლამენტის თავმჯდომარეს უკვე მიემართა.

აღნიშნულ წერილამდე, 22 ნოემბერს თავაძემ პარლამენტის თავმჯდომარეს მიმართა, რათა პლენარულ სხდომაზე კენჭისყრისთვის მისი კანდიდატურის წარდგენა გარკვეული ვადით გადაედოთ. როგორც თავაძე ამბობს, ამ განცხადებას საზოგადოებაში არაერთგვაროვანი რეაქცია მოჰყვა.

"გაჩნდა კითხვები, ხომ არ იყო ჩემი ქმედებები საზოგადოებრივ განწყობაზე გავლენის მოხდენის და არა მოცემული საკითხის მოქმედი კანონმდებლობით დადგენილი პროცედურების დაცვით დადასტურების მიზნით განხორციელებული. როგორც წინარე წერილში აღვნიშნე, ჩემთვის, როგორც მოქმედი საკონსტიტუციო სასამართლოს თავმჯდომარისთვის, სისხლხორცეულად მნიშვნელოვანია სასამართლო ხელისუფლების უმწიკვლოდ და ობიექტურად ფუნქციონირება და შესაბამისად, ვფიქრობ, ამ მიმართულებით ნებისმიერი, თუნდაც დაუსაბუთებელი კითხვა უნდა იყოს მოხსნილი", — წერს თავაძე.

ზაზა თავაძის უმაღლესი განათლების ხარისხთან დაკავშირებით არაერთი კითხვა გაჩნდა. სახალხო დამცველის მონიტორინგის ანგარიშის მიხედვით, უზენაესის მოსამართლეობის 3 კანდიდატის, მათ შორის ზაზა თავაძის, შალვა თადუმაძის და მირანდა ერემაძის უმაღლესი იურიდიული განათლების არანაკლებ მაგისტრის ხარისხით ქონა სათანადოდ არ არის დადასტურებული ან კითხვებს აჩენს.

საკონსტიტუციო სასამართლოს თავმჯდომარის განათლებასთან კითხვები გაჩნდა იურიდიულ საკითხთა კომიტეტის მოსმენაზეც. ზაზა თავაძის დიპლომის მიხედვით, მან ოთხი წელი ისწავლა სამართალზე შემდეგ კი მაგისტრატურა საერთაშორისო ბიზნესის ადმინისტრირების განხრით გააგრძელა. მან აღნიშნა, რომ ის სამართლის განხრით დოქტორანტურაში სწავლობს.