ჩვენმა მკითხველმა უკვე იცის, რომ ავსტრალიაში გამძვინვარებულმა ხანძარმა ქვეყანას დიდი ეკოლოგიური ზიანი მიაყენა.

მილიონ ჰექტარზე მეტ დამწვარ ტყეზე რომ არაფერი ვთქვათ, განსაკუთრებული საფრთხის ქვეშ ისედაც გადაშენების პირას მყოფი კოალები აღმოჩნდნენ, რომელთა საცხოვრებლის 75% განადგურდა, მათი 350-ზე მეტი ინდივიდი კი უბრალოდ დაიღუპა.

სწორედ ამიტომ, იმ ცხოველების მოსაძებნად, რომლებიც ხანძარს გადაურჩნენ, ქუინსლენდის ტერიტორიაზე სპეციალური ჯგუფები შეიქმნა.

ერთი ასეთი ჯგუფის განსაკუთრებული წევრი კი არა ადამიანი, არამედ ძაღლია, რომელსაც Bear (დათვი) ჰქვია და რომელიც კოალების სამძებრო სამუშაოებში აქტიურად იღებს მონაწილეობას.

"ჩვენ საკმაოდ რთულ რეგიონში გვიწევს მუშაობა, სადაც ხანძარმა უამრავი გარეული ცხოველის სიცოცხლე იმსხვერპლა, განსაკუთრებით კი კოალები დაზარალდნენ. მეძებარი ძაღლი ძალიან გვეხმარება საქმის გამარტივებაში, რადგან ის იშვიათი გამონაკლისია, რომელსაც ცოცხალ კოალას ყნოსვით შეუძლია მიაგნოს მათი ბეწვის სუნის საშუალებით და შესაბამისად, სიკვდილისგან იხსნას", — წერია ცხოველთა კეთილდღეობის საერთაშორისო ფონდის ფეისბუქზე.

ფოტო: IFAW Australia

6 წლის ძაღლი სპეციალურად გაწვრთნეს იმისთვის, რომ დაობლებული ან დაშავებული კოალები იპოვოს

ფოტო: IFAW Australia

ფოტო: Queensland Koala Crusaders

აღსანიშნავია, რომ ამ გმირ ძაღლზე, რომელიც საკუთარ საქმეს დიდი პასუხისმგებლობით ეკიდება და უკვე უამრავი კოალა ჰყავს გადარჩენილი, თავის დროზე პატრონმა უარი თქვა და ცხოველთა თავშესაფარში დატოვა.

ფონდის თანამშრომლები იმასაც აღნიშნავენ, რომ ძაღლი ძალიან ყურადღებიანია და არ აქვს მტაცებლური ინსტიქტები, შესაბამისად კონცეტრირებას სუნზე ახდენს და არა თავად ცხოველზე. ეს თვისებები კი მას ეხმარება, რომ მსოფლიოს ერთ-ერთი საუკეთესო მეძებარი ძაღლის სტატუსი ჰქონდეს.