სტუდია მონიტორის მიერ მოპოვებული ინფორმაციით, ლაბორატორიული კვლევით დადგინდა რომ საქართველოში შემოტანილ აზერბაიჯანულ დიზელში გოგირდის შემცველობა ევროპულ ნორმას 6,5-ჯერ აჭარბებს, თუმცა ქართულ სტანდარტს შეესაბამება. სიუჟეტის ავტორმა ლაბორატორიულად შეამოწმა ასევე 5 ავტოგასამართი სადგურის რეგულარის ტიპის ბენზინი და დაადგინა, რომ ისინი ქართულ ნორმებს შეესაბამებოდა.

სტუდია მონიტორის ცნობით, გოგირდი მომწამვლელი ნივთიერებაა, რომელიც ჰაერში მოხვედრის შემდეგ ფილტვის დაავადებებს იწვევს. ევროპული პრაქტიკის მიხედვით, დიზელში გოგირდის შემცველობა 10მგ-ია კილოგრამზე. გამოკვლევის თანახმად კი საქართველოში ევროპულ ნორმასთან შედარებით 15-ჯერ მაღალი, 150 მგ-ია კილოგრამზე.

ლაბორატორიის შედეგებით, აზერბაიჯანულ დიზელში გოგირდი 70მგ აღმოჩნდა, რაც ევროპულ ნორმას 6,5-ჯერ აღემატება.

სტუდია მონიტორი საქსტატის მონაცემებზე დაყრდნობით აცხადებს, რომ ბოლო ხუთი წლის განმავლობაში, ყველაზე დიდი რაოდენობით დიზელი აზერბაიჯანიდან შემოდის. ხოლო, აზერბაიჯანული დიზელის საწვავს მოიხმარს საზოგადოებრივი ტრანსპორტი.

სიუჟეტში ასევე აღნიშნულია, რომ ბოლო 4 წლის განმავლობაში, დედაქალაქში მომუშავე 700-მდე ავტობუსისთვის სატრანსპორტო კომპანიამ 28 მილიონი ლიტრი აზერბაიჯანული დიზელი შეიძინა.

გარემოს დაცვის სამინისტროს წარმომადგენლის ნოე მეგრელიშვილის თქმით, დიზელის კუთხით, უახლოეს თვეებში გამკაცრების გრაფიკი ჩაიდება კანონმდებლობაში. მისივე განცხადებით, ამ მხრივ უფრო დიდი ნაბიჯებია გადასადგმელი ევროსტანდარტამდე მისასვლელად.

თხევად საწვავთან გოგირდის შემცირების შესახებ ევრო დირექტივის თანახმად, ამ კუთხით საქართველოს ეროვნული კანონმდებლობის მოწესრიგება ევალება.