"გთხოვთ, გაითვალისწინოთ და ყველგან უკრაინასთან ერთად ახსენოთ საქართველო", — ამ სიტყვებით ევროპარლამენტარებს ბოდბელმა ეპისკოპოსმა იაკობმა მიმართა. მეუფე იაკობის განცხადება რუსთავი 2-მა გაავრცელა. მეუფე იაკობის თქმითვე, ნატო საქართველოს არჩევანია და მოსახლეობის უმრავლესობა ამას მხარს უჭერს.

ევროპარლამენტში გამოსვლისას მეუფე იაკობმა იმედი გამოთქვა, რომ ოკუპაციასთან ბრძოლაში ევროპელი და ამერიკელი სტრატეგიული პარტნიორები დაგვეხმარებიან:

"მე აფხაზეთის ომის მონაწილე ვარ. ძალიან ბევრი მეგობარი დავკარგე. ყოველთვის ვუთანაგრძნობდი აფხაზ ხალხს, რადგან ეს არ იყო ჩვენი და აფხაზების ომი. ეს იყო რუსეთ-საქართველოს ომი. ამას მოჰყვა საქართველოს დიდი ტერიტორიების ოკუპაცია. რუსეთს არ სურს, რომ საქართველო ძლიერი იყოს. მინდა იცოდეთ, რომ საქართველოს მოსახლეობის უდიდესი ნაწილი თავს ევროპელად მიიჩნევს და ევროპისკენ მივისწრაფვით და არა დამპყრობლისკენ".

მისივე თქმით, რუსეთთან ურთიერთობები გაყინულია. მან, ასევე, მადლობა გადაუხადა ევროპარლამენტარებს ტერიტორიული მთლიანობის აღიარებისთვის:

"ეს ძალიან კარგია. უკრაინაზე ხშირად არის ლაპარაკი და ხშირად საქართველოს საკითხი გამოტოვებულია. გთხოვთ გაითვალისწინოთ და ყველგან უკრაინასთან ერთად ახსენოთ საქართველო. ამერიკაშიც ვიყავით. დღეს ბრიუსელში ვართ და ხედავთ ჩვენს მეგობრობას... მოლდოვასაც, უკრაინასაც და საქართველოსაც დაუჭირეთ მხარი. გავა დრო და ჩვენ ღირსეულად მოვემზადებით. ჩვენი სახით ერთი ღირსეული წევრი შეგემატებათ ევროკავშირში. ეს არის თავისუფალი ქვეყნების თავისუფალი კავშირი. როგორც მრავალშვილიანი ოჯახია ძალიან კარგი, ასევე საქართველოს და უკრაინის შეერთებაც კარგი იქნება".

გარდა ამისა, იაკობი მიიჩნევს, რომ ევროპელებმა ტოლერანტობა საქართველოსგან უნდა ისწავლოს და ამის მაგალითად თბილისის ცენტრში განლაგებული სხვადასხვა რელიგიური სალოცავი მოჰყავს. თუმცა ამავე დროს ამბობს, რომ ცოდვის მიმართ ტოლერანტულები ვერ იქნებიან.

მართლმადიდებელი ეკლესიის დელეგაციისა და სხვადასხვა რელიგიების წარმომადგენლების ვიზიტი ბრიუსელში 17 ნოემბერს დაიწყო. ვიზიტი რონდელის ფონდის მხარდაჭერით ხორციელდება. მართლმადიებელი ეკლესიის დელეგაციის შემადგენლობაში არიან ბოდბელი მთავარეპისკოპოსი იაკობი, ბელგიისა და ჰოლანდიის ეპისკოპოსი დოსითეოზიდა საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე.