პრეზიდენტის შემდეგ პრემიერ-მინისტრი გიორგი გახარიაც გამოეხმაურა ქვეყანაში განვითარებულ მოვლენებს. პირველი, რაც გახარიამ თქვა არის ის, რომ მიმდინარე პროცესების მიუხედავად ყველაზე მნიშვნელოვანი ბიუჯეტის პროექტია.

მისი თქმით, დღეს მთავრობისა და მმართველი პარტიის წევრების შეკრებაზე მხოლოდ ეს საკითხი განიხილეს და მიმდინარე მოვლენებზე არ უმსჯელიათ. მისივე თქმით, რაც არ უნდა ხდებოდეს სახელმწიფო დაიცავს, როგორც გამოხატვის თავისუფლებას, ასევე, იზრუნებს ბიუჯეტზე.

"რაც არ უნდა ხდებოდეს ჩვენი ცხოვრების, პოლიტიკური პროცესის განმავლობაში, ბიუჯეტი არის ქვეყნის ძირითადი დოკუმენტი, რომელიც ეხება ყველას და ყველაფერს", — განაცხადა მან.

ჟურნალისების კითხვების პასუხად მან განაცხადა, რომ სამწუხაროა კანონპროექტის ვერგასვლა, თუმცა მისი თქმით, ამ დანაპირებს 2024 წელს შეასრულებენ, როცა კონსიტუციის მიხედვით პროპორციულ საარჩევნო სისტემაზე გადავა ქვეყანა.

პარლამენტმა საკონსტიტუციო ცვლილებები ჩააგდო და 2020 წელს არჩევნები პროპორციული სისტემით აღარ გაიმართება. კანონპროექტის მისაღებად 113 ხმა იყო საჭირო, თუმცა 101 მიიღო. 3 დეპუტატი კანონპროექტის წინააღმდეგი იყო, სხვებმა კი თავი შეიკავეს.

ამის გამო უმრავლესობა 11-მა დეპუტატმა დატოვა. ესენი არიან: თამარ ჩუგოშვილი, თამარ ხულორდავა, სოფიო ქაცარავა, გიორგი მოსიძე, დიმიტრი ცქიტიშვილი, ზაზა ხუციშვილი, მარიამ ჯაში, გიორგი ბეგაძე, ზვიად ძიძიგური, ნინო გოგუაძე, გიგა ბუკია.

ოპოზიცია კი მმართველი გუნდის წინააღმდეგ გაერთიანდა და საპროტესტო აქციები დაიწყო. ისინი რიგგარეშე საპარლამენტო არჩევნებს და გარდამავალ მთავრობას ითხოვენ.