პროტესტის მეორე დღეს პრეზიდენტი პროპორციული საარჩევნო სისტემის კანონპროექტის ჩაგდებას გამოეხმაურა და განაცხადა, რომ არ შეიძლება მაშინ, როცა ქვეყანა ოკუპაციას ებრძვის და ეკლესიაზე შეტევას იშუშებს, კანონპროექტის ვერგატანას ასეთი დრამატიზირებული რეაქცია მოყვეს. მისი თქმით, საზოგადოება მუდმივი სკანდალებით გადაიღალა.

"როცა ქვეყანა საოკუპაციო ხაზზე არსებულ დაძაბულობას ყოველდღიურად უმკლავდება და, ყველაფრის მიუხედავად, სტაბილურობის შენარჩუნებას ახერხებს; როცა საზოგადოება იარებს იშუშებს და ეკლესიაზე უმძიმესი შეტევების მიუხედავად, სასოწარკვეთილებას არ ეძლევა, არ შეიძლება, საარჩევნო სისტემაში ცვლილების შეტანამ თუ არშეტანამ ესოდენ დრამატიზებული რეაქცია გამოიწვიოს და ეს შედეგი გამოყენებულ იქნას ახალი დესტაბილიზაციის მცდელობისათვის", — აცხადებს ის.

ზურაბიშვილი განმარტავს, რომ ვერც ერთ საარჩევნო სისტემაზე ვერ ვიტყვით, რომ რომელიმე მეტად ან ნაკლებად დემოკრატიულია. მისი თქმით, ქვეყნები სისტემას პოლიტიკური ამბიციებიდან და გათვლებიდან გამომდინარე ირჩევენ.

"საზოგადოება ამ სისტემის ჩამოყალიბებაში ნაკლებადაა ჩართული და, შესაბამისად, გათვითცნობიერებულიც ნაკლებადაა. მას არჩევნების სამართლიანობა და გამჭვირვალობა აინტერესებს, და ასეც უნდა იყოს", — აცხადებს ის.

პრეზიდენტი ამბობს, რომ სამწუხაროა, რომ ასე ხმამაღლად გაჟღერებული ინიციატივა, რომელიც საერთაშორისო თანამეგობრობის რეკომენდაციებს ეხმიანებოდა და რომელიც მათ მიერ პოზიტიურად შეფასდა, ვერ თუ — არ იქნა ბოლომდე მიყვანილი.

"თუმცა, როგორც არ უნდა შეფასდეს პარლამენტში განვითარებული პროცესები, ისიც უნდა ითქვას, რომ ეს არ არის ქვეყნისთვის დაუძლეველი სირთულე ან დემოკრატიის დასასრული. ჩვენმა დემოკრატიამ ბევრად რთული დღეები, ბევრად დიდი განსაცდელი გამოიარა, რასაც გავუმკლავდით.

ამ ვითარებასაც დავძლევთ, თუკი იქნება ყველა მხარის პოლიტიკური ნება; თუკი ყველა შეიკავებს თავს დაძაბულობის გაღრმავებისა და პოლარიზაციის გამწვავებისგან. პოლიტიკური პასუხისმგებლობა ამას ჰქვია და იგი ყველას მოეთხოვება", — აცხადებ ის.

პრეზიდენტი მიმართავს ხელისუფლებას და ოპოზიციას, რომ გამონახონ საერთო ენა, დახვეწონ საარჩევნო კოდექსი და შექმნან მაქსიმალური პირობები სამართლიანი არჩევნების ჩასატარებლად.

პარლამენტმა საკონსტიტუციო ცვლილებები ჩააგდო და 2020 წელს არჩევნები პროპორციული სისტემით აღარ გაიმართება. კანონპროექტის მისაღებად 113 ხმა იყო საჭირო, თუმცა 101 მიიღო. 3 დეპუტატი კანონპროექტის წინააღმდეგი იყო, სხვებმა კი თავი შეიკავეს.

ამის გამო უმრავლესობა 11-მა დეპუტატმა დატოვა. ესენი არიან: თამარ ჩუგოშვილი, თამარ ხულორდავა, სოფიო ქაცარავა, გიორგი მოსიძე, დიმიტრი ცქიტიშვილი, ზაზა ხუციშვილი, მარიამ ჯაში, გიორგი ბეგაძე, ზვიად ძიძიგური, ნინო გოგუაძე, გიგა ბუკია.

ოპოზიცია კი მმართველი გუნდის წინააღმდეგ გაერთიანდა და საპროტესტო აქციები დაიწყო. ისინი რიგგარეშე საპარლამენტო არჩევნებს და გარდამავალ მთავრობას ითხოვენ.