საქართველოში ევროკავშირის ელჩი, კარლ ჰარცელი აცხადებს, რომ პარლამენტში პროპორციული საარჩევნო სისტემის ჩავარდნა სამწუხაროა. მან კიდევ ერთხელ თქვა, რომ პარლამენტში წარმართული პროცესები დააზიანებს ნდობას პოლიტიკურ პარტიებსა და საზოგადოების სხვადასხვა ჯგუფებს შორის და პოლიტიკური პოლარიზაციის რისკს ზრდის.

"ძალიან სამწუხაროა ის რაც გუშინ ვიხილეთ. ახლა მე ვხვდები და მოლაპარაკებები მაქვს სხვადასხვა ჯგუფთან. მექნება შეხვედრა პოლიტიკური პარტიების ლიდერებთან, რათა სამომავლო გეგმებზე ვიმსჯელოთ", — განაცხადა ჟურნალისტებთან კარლ ჰარცელმა.

დღეს, 15 ნოემბერს პარლამენტის მიერ პროპორციული სისტემის პროექტის ჩაგდების მეორე დღეს, ევროკავშირის ელჩი ქართული ოცნების ცენტრალურ ოფისში მივიდა.

ქართული ოცნების პრესსამსახურში აცხადებენ, რომ ელჩი პარლამენტის თავმჯდომარეს, არჩილ თალაკვაძეს შეხვდა. კარლ ჰარცელმა შესვლამდე ჟურნალისტებს უთხრა, რომ იქ კონსულტაციებისთვის მივიდა. გარდა ამისა, TV პირველმა ცენტრალურ ოფისში მისვლისას ბიძინა ივანიშვილიც დააფიქსირა.

ქართული ოცნების განცხადებაში ვკითხულობთ, რომ პარლამენტის თავმჯდომარემ და ელჩმა პროპორციულ არჩევნებთან დაკავშირებით მიღებულ გადაწყვეტილებაზე ისაუბრეს და არსებული სიტუაცია განიხილეს.

14 ნოემბერს ქართულმა ოცნებამ დაპირება არ შეასრულა და პროპორციული საარჩევნო სისტემის კანონპროექტი ჩააგდო. პროექტის ჩაგდებამ უკმაყოფილება გამოიწვია როგორც საზოგადოებაში, ისე არასამთავრობო ორგანიზაციებსა და ოპოზიციაში. სწორედ ამ მიზეზით პარლამენტთან რამდენიმე ათასი ადამიანი გავიდა და რუსთაველის გამზირი გადაკეტა.