ქართული ოცნების დეპუტატმა გია ვოლსკიმ დიმიტრი ხუნდაძესა და ფრაქციის წევრებს მოუწოდა, რომ პოლემიკისთვის შესვენების დროს მის ოთახში შეიკრიბონ. საქართველოს პარლამენტი დღეს პროპორციულ საარჩევნო სისტემაზე გადასვლას უყრის კენჭს. ამ ცვლილებას ქართული ოცნების რამდენიმე მაჟორიტარი დეპუტატი არ უჭერს მხარს, მათ შორისაა დიმიტრი ხუნდაძე.

"ძალიან გთხოვთ, შესვენბის დროს ყველას, ვისაც აინტერესებს, მაგრამ განსაკუთრებით ფრქციის ხელმძღვანელებს, შევიკრიბოთ ჩემთან ოთახში, ბატონო დიტო [ხუნდაძე] თქვენც გთხოვთ და იქნებ ამ თემაზე პოლემიკა აღარ გავაგრძელოთ", — თქვა გია ვოლსკიმ.

დიმიტრი ხუნდაძე დღეს ითხოვდა, რომ განხილვა გადადებულიყო და უმრავლესობის სხდომა შეკრებილიყო, ამ წინადადებაზე მას უმრავლესობის ლიდერმა, ფრაქციის ლიდერმა და პარლამენის თავმჯდომარემ უთხრეს უარი. საკონსტიტუციო ცვლილებას მხარს უჭერენ ნაციონალური მოძრაობა და ევროპული საქართველო.

საპარლამენტო უმრავლესობის მიერ მომზადებული პროექტი 2020 წლის საპარლამენტო არჩევნების პროპორციული სისტემით ჩატარებას ითვალისწინებს. კერძოდ, პოლიტიკური სუბიექტის მანდატების რაოდენობის დასადგენად, პარტიის მიერ მიღებული ხმების რაოდენობა 150-ზე გამრავლდება და არჩევნებში მონაწილე ყველა პოლიტიკური ძალის მიერ მიღებული ხმების ჯამზე გაიყოფა. არჩევნები ნულოვანი ბარიერის პირობებში ჩატარდება. ასევე, ახალი პროექტი საარჩევნო ბლოკების მონაწილეობის შესაძლებლობას არ ითვალისწინებს.

პროპორციული საარჩევნო სისტემა ერთ-ერთი მთავარი მოთხოვნა იყო, რომელიც მოძრაობა #სირცხვილიამ წამოუყენა ხელისუფლებას მას შემდეგ, რაც რუსი დეპუტატის, სერგეი გავრილოვის ვიზიტის გამო აქციები დაიწყო. პროტესტის მეხუთე დღეს მმართველ გუნდს დათმობაზე მოუწია წასვლა. პარტიის ლიდერმა, ბიძინა ივანიშვილმა საზოგადოებას ამცნო, რომ 2020 წელს არჩევნებს პროპორციული სისტემითა და ნულოვანი ბარიერით ჩაატარებდნენ.

გაიგე მეტი: