"გადავწყვიტე, ტყუილად აქ სიარულს ძაღლი გამოვასეირნო ხოლმე, ვერ ვიცლი ამისთვის", — ამის შესახებ მთავარი არხის გენერალურმა დირექტორმა, ნიკა გვარამიამ პროკურატურაში მისვლისას განაცხადა. მას უწყებამ ახალი ბრალი წაუყენა.

"აწი სულ ძაღლით მოვალ ხოლმე. ვერ ვაკადრებ ედგარს იმას, რომ შევიყვანო და მას მოვასმენინო. იქნებ რამე გაიგოს, ჩამოვიდნენ ევოლუციის კიბეზე ცოტა დაბლა ედგარის მეშვეობით, იქნებ კარგად გაიგოს რას გვედავებიან", — აღნიშნა გვარამიამ.

11 აგვისტოს რუსთავი 2-ის ყოფილ დირექტორს სასამართლომ აღკვეთის ღონისძიებად 40 ათასი ლარის ოდენობით გირაო შეუფარდა და პროკურატურის ნებართვის გარეშე ქვეყნის დატოვება აუკრძალა.

ნიკა გვარამიას წინააღმდეგ 16 ივლისს რუსთავი 2-ის 9-პროცენტიანი წილის ყოფილმა მფლობელმა, ნინო ნიჟარაძემ პროკურატურაში საჩივარი შეიტანა. ნიჟარაძე ტელეკომპანიის დირექტორის მიერ უფლებამოსილების ბოროტად გამოყენების მუხლით გამოძიების დაწყებას ითხოვდა. ის აცხადებდა, რომ გვარამიას გადაწყვეტილებებმა არხს ფინანსური ზიანი მიაყენა. 6 სექტემბერს ნიკა გვარამიას რუსთავი 2-ის საქმეზე ახალი ბრალი წაუყენეს.