საქართველოს მესამე პრეზიდენტი, მიხეილ სააკაშვილი ამბობს, რომ წყალტუბოს განვითარება მან დაიწყო 2009 წელს. ასე ეხმაურება სააკაშვილი ვიდეომიმართვაში ბიძინა ივანიშვილის "წყალტუბოს აღორძინების" გეგმას.

მისი თქმით, 2009 წელს მათ დევნილებს ახალი ბინები აუშენეს, სანატორიუმიდან გამოიყვანეს და შემდეგ დაიწყეს ამავე სანატორიუმის განვითარება, რათა დევნილები იქ დასაქმებულიყვნენ.

"მე სპეციალურად ვიმოგზაურე მარაქეშში, მაშინდელ მაროკოში და ავიღეთ ზუსტი ასლი მსოფლიოს ყველაზე ცნობილი სასტუმრო მამუნიასი და ამ ზუსტ ასლს ვაშენებდით სანატორიუმ, ყოფილ შახტიორის ადგილზე და ეს უნდა ყოფილიყო წყალტუბოს ინტერკონტინენტალი, ამის მშენებლობა უნდა დასრულებულიყო 2014 წელს. პარკში, რომელიც ჩვენ ავიღეთ, მსოფლიო ბანკის პროექტით გავაკეთეთ, ვდგამდით ზუსტ ასლს ბადენ-ბადენის ცნობილი აბანოების კარაკალასი, ოღონდ გაუმჯობესებულს, გათანამედროვებულს, მსოფლიოში უნიკალურს", — ამბობს სააკაშვილი.

მისივე თქმით, თითქმის ყველა ტურისტულ ობიექტზე ჰქონდათ პროექტები, რომლის ძირითადი ნაწილი 2013 წელს უნდა დასრულებულიყო, ნაწილი ორი წლის შემდეგ. თუმცა, მისივე თქმით, მოვიდა ივანიშვილი და ყველაფერი გააჩერა.

სააკაშვილი აცხადებს, რომ ივანიშვილი ემზადება ხელისუფლების დაკარგვისთვის და ამზადებს ხალხს, რომლებიც გარანტიას მისცემენ, რომ მის ქონებას არ შეეხებიან.

"ვერ მივართვით. საქართველო და ქართველი ხალხი დაიბრუნებს თავის სიმდიდრეს, გაამრავლებს და ქართველები აღარ წავლენ საქართველოდან", — აღნიშნავს სააკაშვილი.

ბიძინა ივანიშვილი "წყალტუბოს აღორძინების პროექტს" გეგმავს. ქართული ოცნების განცხადებაში ნათქვამია, რომ ივანიშვილი 22-ვე სანატორიუმის, 9 აბანოს გამოსყიდვასა და მათ სრულ რეაბილიტაციას გეგმავს. ქართული ოცნების თავმჯდომარე აღნიშნავს, რომ მისთვის "მოგებაზე არაა საუბარი", არამედ, აპირებს, რეაბილიტირებული სანატორიუმები "მნიშვნელოვანი ფასდაკლებით" გაასხვისოს.