ამერიკის შეერთებული შტატების ელჩის მოვალეობის შემსრულებელი ამბობს, რომ აშშ შეშფოთებას გამოთქვამს ოკუპირებული ცხინვალის რეგიონის ე.წ. სასაზღვარო ხაზთან განვითარებული მოვლენების გამო. ამაზე ელიზაბედ რუდმა დღეს, 26 ოქტომბერს ჟურნალისტებთან ისაუბრა. მან, ასევე, "შემაშფოთებელი" უწოდა იმას, რომ რუსმა სამხედროებმა ევროკავშირის სადამკვირვებლო მისიის მონიტორები დააკავეს:

ეს მიუღებელია, ევროკავშირის სადამკვირვებლო მისიის მონიტორები ასრულებდნენ თავის მოვალეობას მანდატის ფარგლებში. შესაბამისად, ჩვენ მოვუწოდებთ რუსეთის ფედერაციას, სამხრეთ ოსეთის დე ფაქტო ხელისუფლებას, რომ გამოიყენონ ყველა არსებული მექანიზმი და ზომა, რათა ასეთი რამ აღარ განმეორდეს ჩორჩანა-წნელისში და მოხდეს სიტუაციის დეესკალაცია".

რამდენიმე დღის წინ ევროკავშირის სადამკვირვებლო მონიტორები საოკუპაციო რეჟიმის წარმომადგენლებმა დააკავეს. ევროკავშირის მისიის ცნობით, ისინი თბილისის მიერ კონტროლირებად ტერიტორიაზე აიყვანეს. EUMM ღრმა შეშფოთებას გამოხატავს იმის გამო, რომ შეიარაღებული პირები არ აძლევენ დამკვირვებლებს საშუალებას, თავიანთი მანდატის ფარგლებში იმუშაონ.

დე ფაქტო ხელისუფლება მომხდარს "პროვოკაციად" აფასებს და აცხადებს, რომ "ქართული სპეცსამსახურები აქტიურად აგრძელებენ ამგვარ პოლიტიკას". მათი მტკიცებით სადამკვირვებლო მისიის წარმომადგენლებმა ე.წ. საზღვარი გადაკვეთეს.