კონტი ჯგუფს პოზიცია არ შეუცვლია და კონსორციუმს ტოვებს

Business Media Georgia-ს ინფორმაციით, ამერიკული კომპანია კონტი ჯგუფი უარყოფს, ანაკლიის განვითარების კონსორციუმის განცხადებას იმის შესახებ, რომ ისინი პროექტს არ ტოვებენ. გამოცემა წერს, რომ კონტი ჯგუფის განცხადება წერილობითი ფორმით მიიღეს, მოგვიანებით კი ორგანიზაციის წევრმა ეს ინტერვიუშიც დაუდასტურა.

"თუ შეხედავთ იმ განცხადებას, ჩვენ ვხსნით, რომ ტრანზაქცია, რომელიც უნდა განხორციელებულიყო ისე ჩანს, რომ დროში ვერ ეტევა. ამდენად ჩვენ კი არ ვბრუნდებით პროექტში, ჩვენ უბრალოდ ვერ ვახერხებთ, წილი გავასხვისოთ. ჩვენი მიზანია, შევეცადოთ და გავყიდოთ ეს წილი... დაბეჯითებით ვამბობთ, რომ განცხადება, რომელსაც ამ დრომდე ავრცელებდა მედია, არასწორია. სწორედ ამისთვის გამოგიგზავნეთ ეს პრესრელიზიც, რომ რაც შეიძლება დავაზუსტოთ ჩვენი პოზიცია", — განმარტავს BM.GE-სთან საუბრისას კონტი ჯგუფის საინფორმაციო ოფიცერი კოლინ ვაიბლი.

დღეს, ანაკლიის განვითარების კონსორციუმმა გაავრცელა ინფორმაცია, რომ კონტი ჯგუფმა გადაწყვეტილება შეცვალა და პროექტში ბრუნდება. ახლა კი კონსორციუმი განმარტავს: "იმის და მიუხედავად, რომ Conti International იტოვებს პროექტიდან გასვლის სურვილს, მსგავსი ტრანაქცია უახლოეს მომავალში არ იგეგმება".

BM.GE მათთვის გაგზავნილი წერილის დედანს და თარგმანს ავრცელებს:

"ამ წლის დასაწყისში კონტი ინტერნეშენელმა, კონტი ჯგუფის წევრმა და ანაკლიის განვითარების კონსორციუმის დამფუძნებელმა პარტნიორმა მიაღწიეს შეთანხმებას, გაყიდონ საკუთარი წილი ანაკლიის პორტის პროექტში და დატოვონ კონსორციუმი.

მიმდინარე ტრანზაქციას სჭირდება საქართველოს მთავრობის და კონსორციუმის სხვა წევრების შეთანხმება; ამ დრომდე არცერთი ეს შეთანხმება მიღწეული არ არის და მათი მიღწევა ნაკლებ სავარაუდოა დათქმულ ვადამდე. შედეგად, ტრანზაქციის დახურვა ვერ მოხერხდება და დახურვის დრო ოქტომბრის ბოლოს ამოიწურება.

მიუხედავად იმისა, რომ კონსორციუმმა ვერ შეასრულა ტრანზაქციის ვალდებულება, მედიაში გავრცელებული ინფორმაციის საპირისპიროდ, ვაცხადებთ, რომ კონტის პოზიცია უცვლელია. კონტი გააგრძელებს ანაკლიის პორტის პროექტში საკუთარი წილის გასხვისების პროცესს და დატოვებს კონსორციუმს კონსტრუქციულად ისე, რომ ზიანი არ მიაყენოს პროექტის დასრულებას.

ამდენად, კონტი შეასრულებს ყველა იმ პირობას, რაც საჭიროა კონსორციუმის თანმიმდევრულად და განჭვრეტ ვადაში დატოვებისთვის.

კონტის ყოველთვის სჯეროდა და დღესაც სჯერა ანაკლიის პორტის პროექტის. კონტი მზად არის კონსტრუქციული ურთიერთოებებისთვის კონსორციუმთან, საქართველოს მთავრობასთან და მსესხებლებთან იმ პროცესშიც, როცა ის ტოვებს კონსორციუმს და იმედს იტოვებს, რომ კონსორციუმის სხვა წევრები პროექტს უახლოეს მომავალში დაასრულებენ".