პრემიერ-მინისტრ გიორგი გახარიას განცხადებით, საქართველოს მთავრობა დიდ პატივს სცემს აშშ-ის წარმომადგენელთა პალატის ინიციატივას, დაწესდეს სანქციები იმ პირებზე, რომლებიც ოკუპირებულ რეგიონებში ადამიანის უფლებების შელახვის პროცესში მონაწილეობენ. აშშ-ის წარმომადგენელთა პალატამ "საქართველოს მხარდამჭერი ორპარტიული აქტი" გუშინ, 23 ოქტომბერს ერთხმად დაამტკიცა.

გახარიას თქმით, ძალიან მნიშვნელოვანია ამ აქტის ეკონომიკური კომპონენტიც, სადაც ხაზგასმულია შესაძლო თავისუფალ სავაჭრო რეჟიმზე მუშაობის გააქტიურება.

"მსურს აღვნიშნო, რამდენიმე ძალიან მნიშვნელოვანი მომენტი, რომელიც ამ აქტშია ხაზგასმული. პირველი, რა თქმა უნდა, ჩვენი ქვეყნის დამოუკიდებლობა და ტერიტორიული მთლიანობა. ასევე, ერთმნიშვნელოვნად ხაზგასმულია საქართველოს უსაფრთხოების კონტექსტის გაძლიერების აუცილებლობა. რა თქმა უნდა, ადამიანის უფლებების დაცვა ოკუპირებულ ტერიტორიებზე. ჩვენ დიდ პატივს ვცემთ იმ წინადადებას, რომელიც ამ აქტში იყო გამოთქმული შესაბამისი შესაძლო სანქციების დაწესების შესახებ", — განაცხადა მან.

"საქართველოს მხარდამჭერი აქტი" კიდევ ერთხელ ხაზს უსვამს საქართველოს სუვერენიტეტის, დამოუკიდებლობისა და ტერიტორიული მთლიანობისადმი აშშ-ის მტკიცე მხარდაჭერას. აქტის მიხედვით, კონგრესი მოითხოვს სანქციების დაწესებას ყველა იმ პირისადმი, ვინც უშუალოდ მონაწილეობს ან სხვას ეხმარება ოკუპირებულ ტერიტორიებზე ადამიანის უფლებათა უხეშ დარღვევებში. სანქციის ფორმებად აქტში განხილულია: აშშ-ში შესვლის აკრძალვა, ქვეყნიდან გაძევება, ვიზისა, თუ აშშ-ში შესასვლელად საჭირო სხვა შესაბამისი დოკუმენტების არგაცემა/გაუქმება, შესაბამისი ტრანზაქციების დაბლოკვა/აკრძალვა და ფინანასური აქტივების დაყადაღება.