ცნობილმა ამერიკელმა რეჟისორმა, სტივენ სოდერბერგმა, რომელიც ავტორია ისეთი ცნობილი ფილმებისა, როგორებიცაა Erin Brockovich, Traffic და Sex, Lies, and Videotape, სულ ცოტა ხნიწ წინ გადაიღო ახალი ფილმი, რომელიც გამოსვლისთანავე სკანდალში გაეხვა.

The Laundromat - ასე ქვია მის ახალ ფილმს, რომელშიც ჰოლივუდის რჩეული მსახიობები თამაშობენ: იქნება ეს მერილ სტრიპი, გარი ოლდმანი, ანტონიო ბანდერასი თუ შერონ სტოუნი. ვარსკვლავური შემადგენლობის გარდა ამ ფილმს ის დეტალიც გამოარჩევს, რომ ის ნამდვილ ისტორიას ეფუძნება, კერძოდ კი პანამის დოკუმენტებით ცნობილ სკანდალს.

პანამის დოკუმენტები უწოდეს 2015 წელს 11.5 მილიონი დოკუმენტის საჯაროდ გაჟონვის ფაქტს, რამაც ორასი ათასზე მეტი ოფშორული ანგარიში გამოაშკარავდა. ამ ანგარიშების მეშვეობით მრავალ ცნობილ პოლიტიკოსთან ერთად ხელოვნების სხვადასხვა დარგში მოღვაწე ვარსკვლავები ფინანსურ თაღლითობას მიმართავდნენ, რათა ხშირად სახელმწიფო გადასახადებისგან აერიდებინათ თავი.

ამ ამბის ეპიცენტრში იურგენ მოსაკი და რამონ ფონსეკა მოექცნენ, რომლებიც თავიანთი იურიდიული კომპანიის Mossack Fonseca-ს საშუალებით აწარმოებდნენ სხვადასხვა კლიენტებისთვის ოფშორული ანგარიშების გახსნას.

რა თქმა უნდა, სტივენ სოდერბერგს თავის ფილმში რეალური მოვლენების გაცოცხლებისას არც ამ ორი ადამიანის წვლილის აღნიშვნა დავიწყებია, რამაც მათი აღშფოთება გამოიწვია: იურგენ მოსაკმა და რამონ ფონსეკამ სასამართლოში შეიტანეს სარჩელი, რადგან ისინი მიიჩნევდნენ, რომ ფილმი ფაქტებს დამახინჯებულად აღწერდა და მათ უპირობო დამნაშავეებად მიიჩნევდა. ამის გამო მათ ფილმის ჩვენებების შეჩერება სურდათ.

სასამართლომ ეს მოთხოვნა სამართლებრივად მიუღებლად ცნო და ფილმის პრემიერა კინოთეატრებში 27 სექტემბერს დაუბრკოლებლად შედგა, ნეტფლიქსზე კი მისი ნახვა 18 ოქტომბრიდანაა უკვე შესაძლებელი.