21 ოქტომბერს, 19:00 თბილისში, ფოლკლორის ცენტრში, გაიხსნება მხატვარ-დიზაინერის, მაკა ჯიშკარიანის პირველი პერსონალური გამოფენა.

მაკა ჯიშკარიანი ოთხმოცდაათიანელების წარმომადგენელია. მიუხედავად იმ ეპოქის სიძნელეებისა, მან მოახერხა და საქმიანობა მხატვრობის მონათესავე სფეროს — სარეკლამო და გრაფიკულ დიზაინს დაუკავშირა. ამავდროულად, სხვადასხვა სფეროში სცადა თავი: ტანსაცმლის დიზაინი, ტყავის აქსესუარები, ავეჯი, კერამიკა, ინტერიერის დიზაინი. თუმცა, ნებისმიერი მისი ნამუშევრის ამოსავალი წერტილი მაინც ფერწერა იყო.

ახალი ნამუშევრები კი თანამედროვე ტექნოლოგიების, iPad-ის გამოყენებით არის შექმნილი. გარემოზე დაკვირვება, ყოფით ნივთებში სილამაზის დანახვა, საკუთარ შემოქმედებით ფილტრში გატარება და ორგანზომილებაში გადმოტანა. ეს არის პროცესი, რომლის შედეგადაც მაკა შექმნილ გარემოს ასურათებს და თავისი სამყაროს გამოხატულებად აქცევს.

გამოფენა, რომლითაც მხატვარი საზოგადოების წინაშე წარდგება, ერთ სერიას წარმოადგენს. ყველა ნამუშევარი iPad-ზეა შექმნილი, ამობეჭდილია ნატურალურ ტილოზე ლიმიტირებულად. თითოეულს აქვს თავისი ნომერი და ავტორის ხელმოწერა, რაც ნამუშევარს ორიგინალად აქცევს. გამოფენა გასტანს 2019 წლის 26 ოქტომბრის ჩათვლით.