1883 წელს გამოქვეყნებულ ესეში ცნობილი ამერიკელი მწერალი, სტივენ კინგი წერდა, რომ თავისი ერთ-ერთი ყველაზე პოპულარული და საშინელებათა ჟანრის საკულტო წიგნად აღიარებული ნაწარმოების, It-ის დაწერის იდეა მაშინ მოუვიდა, როცა მეინის შტატში მდებარე ქალაქ ბანგორში გადავიდა საცხოვრებლად.

სულ მალე კი იქ მდებარე სახლი, სადაც ეს მსოფლიო ბესტსელერების ავტორი წლების განმავლობაში ცხოვრობდა, ბევრისათვის ღია გახდება. ესაა სწორედ ის სახლი, რომლის კედლებს შორისაც სტივენ კინგს ერთმანეთზე უფრო საშიში ისტორიების იდეები ებადებოდა და შემდეგ ისინი ფურცლებზე გადაჰქონდა.

რამდენიმე დღის წინ ამ ცნობილმა ამერიკელმა მწერალმა და მისმა ცოლმა, ტაბიტა კინგმა სასამართლოს მიმართეს, რათა მათ საერთო სახლს არაკომერციული სტატუსი მიენიჭოს და საზოგადოებრივი დანიშნულებისთვის გამოიყენონ, კერძოდ კი ის გახდება ერთგვარი არქივი, რომელიც მწერლის მიერ წლების განმავლობაში შეგროვებულ მასალებს მოუყრის თავს.

სტივენ კინგი 1982 წელს მეინის შტატში მდებარე თავისი სახლის ჭიშკართან.

ფოტო: Carroll Hall | BDN

არქივით სარგებლობა დაინტერესებულ პირებს შეეძლებათ, სახლი კი ამავდროულად მწერლების რეზიდენციაც იქნება, სადაც ხუთამდე მწერალს ერთდროულად შეეძლება მშვიდ გარემოში იმუშაოს. ამასთან დაკავშირებით თავად სტივენ კინგმაც გააკეთა კომენტარი:

"რეზიდენცია, სავარაუდოდ, ერთ-ორ წელიწადში გაიხსენება. არქივს ფორმალურად მეინის უნივერსიტეტი განაგებს და მასალებთან გაცნობა მხოლოდ წინასწარი მოთხოვნის საფუძველზე იქნება შესაძლებელი. ეს სახლი არ იქნება მუზეუმი ან რაიმე მსგავსი საჯარო დაწესებულება, მაგრამ იქ დაცული არქივით სარგებლობა მწერლებთან ერთად მკვლევრებსაც შეეძლებათ."

ეს ყველაფერი კარგი, მაგრამ იმედია, სახლში მარტო დარჩენილ მწერლებს შემდეგ რამე საშინელება არ გადახდებათ თავს.