ფსორიაზი კანის ქრონიკული ანთებითი ხასიათის დაავადებაა და კანზე ბალთების გაჩენით ავლენს თავს. დაავადება შეიძლება მოიცავდეს მთელ სხეულს, თუმცა ფსორიაზისთვის დამახასიათებელი გამონაყარი უფრო ხშირად იდაყვების და მუხლების მომხრელ ზედაპირზე გვხვდება. პათოლოგია შესაძლოა გამოვლინდეს ნებისმიერი სქესისა და ასაკის პაციენტებში. დაავადების გამომწვევი ზუსტი მიზეზები ჯერ-ჯერობით უცნობია, თუმცა კლინიკური სიმპტომატიკის გამოვლენაში მნიშვნელოვან როლს თამაშობს გარე-ფაქტორები: ალკოჰოლის მიღება, თამბაქოს მოხმარება, ხშირი სტრესული გამღიზიანებელი და სხვა.

ახლახანს გამოქვეყნებული კვლევის ხელმძღვანელი ალექს ტრეფორდია, მანჩესტერის უნივერსიტეტის პროფესორი. მან და მისმა კოლეგებმა 58 კვლევა შეაჯამეს და დაადგინეს, რომ ფსორიაზის ნებისმიერი ფორმით ავადობის დროს კიბოს განვითარების რისკი 18%-ით იზრდება, ხოლო მწვავე ფსორიაზის დროს კი — 22%-ით. ფსორიაზის ყველა შემთხვევაში კიბოთი სიკვდილიანობის მაჩვენებელიც გაზრდილი გახლდათ.

აქვე უნდა აღინიშნოს, რომ კიბოს ზოგიერთი სახეობის დროს, რისკი უფრო მაღალი იყო. მაგალითად: მწვავე ფსორიაზი 11-ჯერ ზრდის კანის კიბოს რისკს, ორმაგად საყლაპავის და ღვიძლის, ხოლო პანკრეასის კიბოს რისკს — 45%-ით.

ფსორიაზის ნებისმიერი ფორმით ავადობა ასევე მნიშვნელოვან კავშირში აღმოჩნდა მსხვილი ნაწლავის კიბოსთან, არა-ჰოჯკინის ლომფომასთან, თირკმლისა და პანკრეასის კიბოსთან.

ასევე იხილეთ:

ორ დაავადებას შორის ასეთი კავშირის მიზეზი ჯერ-ჯერობით უცნობია, თუმცა მეცნიერები აქამდეც საუბრობდნენ ქრონიკული ანთებითი პროცესებისა და კიბოს კორელაციაზე — შესაძლოა სწორედ ეს დაეხმაროთ მათ ზუსტი მექანიზმის გამოვლენაში.

ალექს ტრეფორდის განცხადებით, კვლევაში მონაწილე ფსორიაზით დაავადებულთა უმრავლესობა სიგარეტის მწეველი იყო, სხეულის უფრო მაღალი წონით გამოირჩეოდა და უფრო მეტ ალკოჰოლს მოიხმარდა. ეს ფაქტორები ამ კვლევებში გათვალისწინებული არ ყოფილა.

შესაძლოა, ჯანსაღი ცხოვრების წესის დანერგვამ რისკის ამ მაჩვენებელზე მნიშვნელოვანი გავლენა მოახდინოს

ალექს ტრეფორდი, კვლევის ხელმძღვანელი, მანჩესტერის უნივერსიტეტის პროფესორი

კვლევა ჟურნალში JAMA Dermatology გამოქვეყნდა.