რუსეთ-საქართველოს შორის პირდაპირი საჰაერო მიმოსვლა 5 თვეა შეწყვეტილია. ფრენების გაუქმების შესახებ გადაწყვეტილება რუსულმა მხარემ 20 ივნისის მოვლენების შემდეგ მიიღო. რამდენიმე დღის წინ მედიაში გავრცელდა ინფორმაცია, რომ რუსეთის სამოქალაქო ავიაციის სააგენტომ, ავიაკომპანია S7 მოსკოვი-ქუთაისის რეისზე ფრენის უფლება მისცა. ეკონომიკის მინისტრის, ნათია თურნავას თქმით, გავრცელებული ინფორმაცია რუსეთთან პირდაპირი ფრენების აღდგენას არ ნიშნავს.

"ჩვენ საჰაერო ადმინისტრაციას ჯერ არ მიუღია რამე სახის შეტყობინება, რომ ფრენები აღდგენილია. აქედან გამომდინარე ვერ დავადასტურებ, რომ ეს არის ფრენების აღდგენა, მაგრამ ისევ ვამბობ, რომ ჩვენ მხოლოდ მივესალმებით თუკი ეს გადაწყვეტილება იქნება მიღებული", — თქვა ნათია თურნავამ.

მინისტრმა აღნიშნა, რომ ფრენების შეწყვეტის გადაწყვეტილება რუსულმა მხარემ მიიღო, ამიტომ მათგან ელოდებიან პოზიტიურ ნაბიჯებს. მისი თქმით, ქართული მხარე ამ თემაზე მოლაპარაკებებს არ აწარმოებს, თუმცა საჰაერო ადმინისტრაცია კონსულტაციების დასაწყებად მზადაა. ნათია თურნავას მანამდეც არაერთხელ აღუნიშნავს, რომ ქართული ტურიზმისა და ეკონომიკური ბაზრისთვის ფრენების აღდგენა პოზიტიური იქნება.

ავიამიმოსვლის აღდგენის შესახებ არასწორი ინფორმაციის გავრცელება რუსეთის ტრანსპორტის სამინისტროს დაქვემდებარებაში მყოფი სააგენტოს, როსავიაციის ბრძანებას მოყვა. 21 ივნისს რუსულ ავიაკომპანიებს საქართველოში ფრენები ვლადიმერ პუტინის გადაწყვეტილებით აეკრძალათ. ტურისტული ემბარგოს დაწესების შემდეგ რუსულმა მხარემ აღნიშნა, რომ ფრენებს სიტუაციის ნორმალიზების შემთხვევაში განაახლებენ.