ანაკლიის განვითარების კონსორციუმის ხელმძღვანელი ლევან ახვლედიანი აცხადებს, რომ მთავრობამ ანაკლიის პროექტის "საბოტაჟირება მოახდინა" ბოლო რამდენიმე თვის და კვირის განმავლობაში. მისივე თქმით, მათ 10 ოქტომბერს ჩააბარეს დოკუმენტაცია, სადაც კონკრეტული ხედვები იყო წარმოდგენილი და დღეს ისინი აღარანაირი დოკუმენტაციის ჩაბარებას აღარ აპირებენ.

კონსორციუმის ხელმძღვანელის თქმით, მთავრობამ ინვესტორი იმის გამო დაიწუნა, რომ "დასავლელი არ იყო", მეორე ფონდს კი მოთხოვნილი წერილი არ გაუგზავნეს:

"დღევანდელი 12 საათის ბრიფინგი ცალსახად ადასტურებს, თუ რა განწყობა აქვთ, იმის ნაცვლად რომ გადავსულიყავით კონსტრუქციულ საუბარზე კიდევ ერთხელ ხდება ნეგატიური დაკნინება ამ პროექტის... ბოლო ექვსი კვირის განმავლობაში, ჩვენ ურთულეს ვითარებაში ვმუშაობდით და შევძელით მოგვეძიებინა ორი ახალი ინვესტორი, ერთი ყაზახურ-ჰონკონგური ჯგუფი და მეორე ამერიკული. პირველ ინვესტორს, მთავრობამ გაცნობით შეხვედრისას დაუფიქსირა, რომ ისინი არ მიესალმებოდნენ ამ ინვესტიციას რადგან არ იყვნენ დასავლელები, კერძოდ ამერიკელი ინვესტორები. ირონიულია ისიც, რომ ეს ინვესტორები ითხოვდნენ მარტივ რამეს: ღია მხარდაჭერას მთავრობისგან. ჩვენ მოვიყვანეთ ამერიკული ფონდი, რომელიც დაინტერესდა ამ პროექტით. მათ მოითხოვეს წერილობითი განცხადება მთავრობისგან, რომ ისინი მიესალმებოდნენ მათ მოანაწილეობას, ჩვენ ამ წერილს დაგვპირდა მთავრობა, რომ გაუგზავნიდა ამერიკულ ფონდს, მაგრამ ეს წერილი არასოდეს არ მიუვიდა ადრესატს".

ლევან ახვლედიანის განცხადებით, კულუარებში მთავრობამ არერთხელ დააფიქსირა პოზიცია, რომ ანაკლია არაა რენტაბელური ან კომერციულად გამართლებული. საჯარო გამოსვლებში იყო მხარდაჭერა, მაგრამ პირისპირ შეხვედრებში ხდებოდა აბსოლუტურად საწინააღმდეგო.

კონსორციუმის ხელმძღვანელი გამოეხმაურა, ასევე, ხელშეკრულების შეწყვეტის საკითხს და თქვა, რომ ასეთ შემთხვევაში, არცერთი მაღალი რეპუტაციის მქონე ინვესტორი, თუ საფინანსო ინსტიტუტი ამ პროექტს აღარ გაეკარება და იგი ძალიან დიდი ხნით გაჩერდება.

ლევან ახვლედიანის თქმით, ისინი ვერ დაარღვევენ "კონფიდენციალობის პუნქტს" და ვერ გაასაჯაროვებენ წერილს, თუმცა აღნიშნავს, რომ მათ წერილში ზუსტად არის აღწერილი რა ქმედებებია საჭირო იმისათვის რომ პროექტი წინ წავიდეს.

მაია ცქიტიშვილმა 15 ოქტომბერს, ვადის ამოწურვამდე 6 საათით ადრე გამართულ სპეციალურ ბრიფინგზე განაცხადა, რომ 10 ოქტომბერს მიიღეს ანაკლიის განვითარების კონსორციუმის წერილი, თუმცა ის არ შეიცავს პორტის განვითარების კონკრეტულ გეგმებს ან კონკრეტულ ხედვებს.

ანაკლიის ღრმაწყლოვანი პორტის განვითარების სააგენტოს ხელმძღვანელის თქმით, ხელშეკრულების შეწყვეტაზე გადაწყვეტილებას მხოლოდ სპეციალურად შექმნილი კომისია მიიღებს პრემიერ გიორგი გახარიას ხელმძღვანელობით.