კომპანია სამსუნგი მსოფლიო მასშტაბით წყვეტს თავისი ახალი ტელეფონის, Galaxy Note 7-ის გაყიდვებს. ის ასევე მოუწოდებს თავის პარტნიორებს, შეწყვიტონ ამ ტელეფონის გაყიდვა, ხოლო მათ, ვისაც უკვე ნაყიდი აქვს Note 7, აძლევს რეკომენდაციას, არ გამოიყენონ ის და აუცილებლად დააბრუნონ, სანაცვლოდ კი მიიღებენ ფულად კომპენსაციას, ან სხვა მოდელის ტელეფონს.

Galaxy Note 7-ს პრობლემები მას შემდეგ შეექმნა, რაც არაერთ მომხმარებელს ის უბრალოდ აუფეთქდა. მსგავსი ფაქტების შემდეგ, აშშ-სა და ევროპის ავიაციის სააგენტოებმა მომხმარებლებს აუკრძალეს ამ ტელეფონის ჩართვა-გამოყენება ფრენის დროს. აკრძალვა შეეხო საქართველოს მიმართულებით მომავალ რეისებსაც.

Note 7 სამსუნგის ყველაზე წარუმატებელი ტელეფონი გამოდგა. ის 2016 წლის ზაფხულში გამოუშვეს, თუმცა 2 სექტემბერს, ბატარეის აალების საფრთხის გამო, გაყიდვიდან ამოიღეს. რამდენიმე კვირაში კომპანიამ გამოაცხადა, რომ ბატარეის პრობლემა აღმოფხვრილი იყო, თუმცა აალების შემთხვევები ახალ მოდელებზეც დაფიქსირდა. სწორედ ამიტომ, კომპანიამ მისი გაყიდვები სრულად შეწყვიტა.

ჩვენ ვკითხეთ საქართველოში სამსუნგის ოფიციალურ დისტრიბუტორებს, ალტაოქეის, იყიდებოდა თუ არა მათ ქსელში Galaxy Note 7, თუმცა მათ გვითხრეს, რომ აღნიშნული მოდელები მათ ქსელში ჯერ შემოტანილი არ არის.

სტატიის თავდაპირველ ვერსიაში ეწერა რომ ზუმერი არის საქართველოში სამსუნგის ერთ-ერთი ოფიციალური დისტრიბუტორი, თუმცა მოგვიანებით კომპანიამ განგვიცხადა, რომ ეს ასე არ არის.