მას შემდეგ, რაც ფედერალური ავიაციის ადმინისტრაციამ ამერიკის შეერთებული შტატების მოსახლეობას თვითმფრინავის ბორტზე Samsung Galaxy Note 7-ით სარგებლობისგან თავის შეკავებას ურჩია, მსგავსი აკრძალვა ფრენის დროს თითქმის ყველა ავიაკომპანიამ დააწესა. შეზღუდვა შემოიღო ავიაციის უსაფრთხოების ევროპულმა სააგენტომ. ეს ნიშნავს, რომ რეგულაცია ეხება იმ მგზავრებსაც, რომლებიც საქართველოდან ევროპის მიმართულებით, ან პირიქით მიფრინავენ. გამაფრთხილებელ წარწერას უკვე შეხვდებით ქუთაისის საერთაშორისო აეროპორტშიც.

ფოტო: Giorgi Gelashvili

ბორტზე ყოფნის დროს კი, როდესაც თვითმფრინავში ქცევის წესებს ხსნიან, ამატებენ, რომ მიზანშეწონილი არ არის Samsung Galaxy Note 7-ის გამოყენება. ავიაციის უსაფრთხოების ევროპული სააგენტო ურჩევს მგზავრებს, ფრენის დროს ტელეფონი გამორთონ, არ დატენონ, არ ჩადონ შემოწმებულ ბარგში. გარდა ამისა, მგზავრებმა დახმარებისთვის ბორტგამცილებლებს უნდა დაუძახონ, თუ ტელეფონი გახურდა, კვამლი გამოუშვა, ან სკამებს შორის ჩავარდა და დაიკარგა.

უსაფრთხოების გამკაცრების მიზეზად ტელეფონის ელემენტის ხარვეზს ასახელებენ, რამაც შეიძლება ტელეფონის აფეთქება გამოიწვიოს.

ფოტო: Mr. Ni66666 / Baidu

2 სექტემბერს Samsung-მა მისი უახლესი ტელეფონის - Galaxy Note 7-ის გაყიდვიდან სრული ამოღება მოითხოვა. ამის მიზეზად ტელეფონის აფეთქების შემთხვევები დაასახელეს.