გერმანიის პრეზიდენტმა BBC-ის ჟურნალისტის კითხვაზე, თუ რა იყო რუსეთის როლი, მისი წინადადების, "შტაინმაიერის ფორმულის" შემუშავებაში უკრაინასთან მიმართებით, უპასუხა, რომ "არანაირი". ამაზე მას დღეს, 7 ოქტომბერს, საქართველოში ვიზიტისას, პრეზიდენტ სალომე ზურაბიშვილთან ერთად გამართულ პრესკონფერენციაზე ჰკითხეს.

შტაინმაიერმა განმარტა, რომ 3 წლის წინ პარიზში, ნორმანდიულ ფორმატში დაიწყო მოლაპარაკებები, რაც "მაინც და მაინც წინ არ წასულა".

"ეს იყო პროექტები, რომლებიც მინსკის შეთანხმებისამებრ უნდა განხორციელებულიყო, დანერგილიყო. ფორმულა არის მცდელობა, დიდი ნაბიჯები გარდაქმნილიყო, შედარებით მცირე ზომის ნაბიჯებად, რათა ეს ყოფილიყო მარტივად განსახორციელებელი, მარტივად გადასადგმელი", — განმარტა გერმანიის პრეზიდენტმა.

"შტაინმაიერის ფორმულად" წოდებულ ინიციატივას, რომელიც უკრაინის ოკუპირებულ ტერიტორიაზე არჩევნების გამართვას ითვალისწინებს, ყოფილმა პრეზიდენტმა პეტრო პოროშენკომ "პუტინის ფორმულა" უწოდა. მისი თქმით, "შტაინმაიერის ფორმულა" კრემლში შექმნეს და რუსულ ინტერესებს ატარებს.

პირველ ოქტომბერს პრეზიდენტ ვოლოდიმირ ზელენსკის მთავრობა ინიციატივა დათანხმდა. დოკუმენტს ხელი პირველ ოქტომბერს უკრაინის წარმომადგენელმა, ლეონიდ კუჩმამ საკონტაქტო ჯგუფის ფორმატში მოაწერა. ამ შეთანხმების შემდეგ, სავარაუდოდ, ნორმანდიის სამიტი გაიმართება.

შტაინმაიერის გეგმა უკრაინის აღმოსავლეთით, სეპარატისტების მიერ კონტროლირებად ტერიტორიებისთვის "განსაკუთრებული სტატუსის" მინიჭებას ითვალისწინებს. კანონი განსაკუთრებული სტატუსის შესახებ სამართლიანი არჩევნების ჩატარების შემდეგ ამოქმედდება.

პრეზიდენტი ზელენსკი მოსახლეობას დაპირდა, რომ ეს "არჩევნები იარაღის მუქარით არ ჩატარდება", "არ იქნება კაპიტულაცია" და მხოლოდ საერთაშორისოდ აღიარებულ სტანდარტებს დაექვემდებარება.