უზენაესის მოსამართლეობის კანდიდატი, მაია ვაჩაძის თქმით, ქართული ოცნების ხელისუფლებას წინა ხელისუფლების სამართლებრივი შეფასება არ გაუკეთებია. ამის შესახებ კანდიდატმა მმართველი გუნდის დეპუტატის, მამუკა მდინარაძის კითხვის საპასუხოდ განაცხადა.

მდინარაძე ითხოვდა, რომ მაია ვაჩაძეს დაესახელებინა, თუ როგორი მმართველობის ფორმა იყო წინა ხელისუფლებისას. მოსამართლეობის კანდიდატი განმარტავდა, რომ საერთაშორისო დოკუმენტებიდან გამომდინარე წინა მმართველობა შეფასებული იყო, როგორც სუპერ საპრეზიდენტო მმართველობა. ამის საპირისპიროდ მდინარაძე უშუალოდ მისი პირადი აზრის დაფიქსირებას ითხოვდა, რაზეც ვაჩაძემ უპასუხა:

"თქვენ სასამართლოსგან ელით ამ პასუხს, მე სასამართლოს წარმომადგენელი ვარ. პარლამენტს, დღევანდელ ხელისუფლებას არ გაუკეთებია წინა ხელისუფლების სამართლებრივი შეფასება. მე აქედან ამოვდივარ. როდესაც მოვიდა ახალი ძალა, მისი ერთადერთი დოკუმენტი, რომელიც დაიდო, იყო პოლიტიკური პატიმრების სია. მაგრამ სამართლებრივი შეფასება წინა ხელისუფლების პარლამენტს არ გაუკეთებია. შესაბამისად, დღეს სასამართლოში არ მიდევს სამართლებრივი შეფასება და სამართლებრივი ნორმა, რომლითაც სამართლიანობის აღდგენის დროს ხანდაზმულობას ჩავკეტავ. ეს უდიდესი პრობლემაა. დღეს მოქალაქე მედავება, რომ მან სამართლიანობა ვერ აღადგინა. თუ თქვენ გექნებოდათ სამართლებრივი დოკუმენტი, რომლითაც ხანდაზმულობის ვადის ათვლას 2012 წლიდან დაიწყებდა, მაშინ მე უფრო მეტი შესაძლებლობა მექნებოდა".

მოსამართლის შეფასებით, სამართლებრივი შეფასება არ უნდა იქცეს პოლიტიკური დაპირისპირებისა და ანგარიშსწორების საფუძველი. მისივე განმარტებით, სამართლებრივი შეფასება არის იმის საფუძველი, რომ "ვაღიაროთ შეცდომები, გამოვასწოროთ და წინ წავიდეთ".

პარლამენტში უზენაესის მოსამართლეობის კანდიდატების მოსმენები განაახლა. დღეს, 7 ოქტომბერს დეპუტატები მოსამართლეობის მეექვსე კანდიდატს, მაია ვაჩაძეს უსმენენ.

მაია ვაჩაძე 1999 წლიდან დღემდე უზენაესი სასამართლოს მოსამართლეა. მანამდე, 1998-1999 წლებში იყო თბილისის საოლქო სასამართლოს მოსამართლე.

ის უზენაესი სასამართლოს დიდი პალატის იმ 9-კაციან შემადგენლობაში იყო, რომელმაც რუსთავი 2-ის საქმე განიხილა და შედეგად, ტელეკომპანია ბიზნესმენ ქიბარ ხალვაშს მიაკუთვნეს. ამით უზენაესმა სასამართლომ წინა ორი ინსტანციის გადაწყვეტილება ძალაში დატოვა.

ვაჩაძემ განიხილა უზენაეს სასამართლოში ტრანსგენდერი პირის პირადობის დოკუმენტებში სქესის შესახებ ჩანაწერის ცვლილების საქმე. სარჩელი პირველმა ორმა ინსტანციამ არ დააკმაყოფილა. უზენაეს სასამართლოს უნდა ემსჯელა, თუ რამდენად სწორია, როცა სქესის შეცვლა განმარტება, როგორც ქირურგიული ოპერაცია. უზენაესმა სასამართლომ დაუშვებლად ცნო საჩივარი.