დღეს, 3 ოქტომბერს აღმოსავლეთ ევროპაში პირველად ევროპის დამოუკიდებელი პრესის საბჭოების ალიანსის კონფერენცია იმართება.

სხდომაზე განიხილავენ შემდეგ საკითხებს: ხელოვნური ინტელექტით მართული ჟურნალისტიკა და ავტომატიზაციის გავლენა მედიაზე; თანამედროვე მედიის შემოსავლები, ანუ რა არის მედიის დაფინანსების წყარო ციფრულ ეპოქაში; რა გამოწვევები და ტენდენციებია ამ მხრივ; ასევე, ულტრანაციონალოსტური ჯგუფების გაშუქება, ბოტებისა და ტროლების კომენტარები მედიაკონტენტთან მიმართებით, პლაგიატიზმი და ციტირება.

შეხვედრას ესწრება ევროპის საბჭოს საქართველოს ოფისის ხელმძღვანელი კრისტიან ურსე. საქართველოში არსებული მედიაგარემოს შეფასებისას მან აღნიშნა, რომ ლიბერალური კანონმდებლობა, ახალი მედიასაშუალებების შექმნის კუთხით, ხელს უწყობს მედიაპლურალიზმს:

"ვფიქრობ, მედიის თავისუფლება ერთერთია, რაც ბოლო 20 წელში მოიპოვა საქართველომ. რა თქმა უნდა, ეს უნდა შენარჩუნდეს".

ჟურნალისტების კითხვაზე, რას ფიქრობს იმის შესახებ, რომ მედიის მფლობელებს პროკურატურაში იბარებენ, კრისტიფერ ურსე ამბობს, რომ კონკრეტულ საქმეებს არ იცნობს, არც ის იცის თუ რა სახის გამოძიება მიმდინარეობს და ვერ ისაუბრებს.

ჟურნალისტური ეთიკის ქართიის ხელმძღვანელის, ნატა ძველიშვილის თქმით, ტელევიზიების მფლობელების პროკურატურაში დაბარება და კრიმინალურ საქმეებში მათი სავარაუდო მონაწილეობა ცუდი ნიშანია იმისა, რომ კრიტიკულ მედიას დასაწყისიდანვე შეექმნას საფრთხე.

"მაქვს მოლოდინი, რომ 2020 წლის არჩევნების წინ ხელოსუფლების მხრიდან მედიაზე წნეხი გააქტიურდება. აქ კი მნიშვნელოვანია თვითრეგულირების ორგანიზაციების როლი", — ამბობს ნატა ძველიშვილი.

ევროპის პრესის საბჭოების კონფერენცია ჟურნალისტური ეთიკის ქართიის ორგანიზებითა და ევროპის საბჭოს მხარდაჭერით ტარდება.