გრიპი ვირუსული ინფექციაა. მისი გამომწვევი ვირუსის 4 სახეობა არსებობს: A, B, C და D. ადამიანის გრიპის ვირუსის A და B შტამები ყოველწლიურად, სეზონურად აქტიურდებიან. საქართველოში გრიპის სეზონი ნოემბრიდან იწყება და შესაბამისად, აცრების გაკეთება ოქტომბრიდან არის შესაძლებელი. ვაქცინაცია სასიცოცხლოდ მნიშვნელოვანია მაღალ რისკ-ჯგუფებში მყოფი ადამიანებისთვის: ბავშვები, მოხუცები, იმუნოკომპრომეტირებული ადამიანები, ორსულები, სამედიცინო პერსონალი, ქრონიკული დაავადებების მქონე ადამიანები.

აცრები და მასთან დაკავშირებული საკითხები ყოველთვის მნიშვნელოვანი განხილვის საკითხია. ჩვენ შევეცადეთ ყველაზე აქტუალური კითხვებისთვის გაგვეცა პასუხი

რა ვაქცინით მიმდინარეობს აცრა?

ვაქცინაციისთვის პრეპარატ ინფლუვაკს იყენებენ. ვაქცინა სამვალენტიანია (იგივე სამკომპნენტიანი) ანუ მოიცავს A გრიპის ორ ტიპსა და B გრიპის ერთ ტიპს. ოთხვალენტიან ვაქცინაში დამატებულია B გრიპის კიდევ ერთი ტიპი. ინფლუვაკის შემადგენლობა უშუალოდ 2019-2020 წლების სეზონური გრიპისთვის არის დამტკიცებული ჯანდაცვის მსოფლიო ორგანიზაციის მიერ.

რომელი ქვეყნიდან შემოაქვთ ვაქცინა?

ინფლუვაკი სამვალენტიანი (სამკომპონენტიანი) ვაქცინაა და მისი მწრამოებელი ფარმაცევტული კომპანია Abbot Biologicals გახლავთ. პრეპარატი ჰოლანდიაში მზადდება და იგი ევროპის ჩრდილოეთ ნახევარსფეროს ქვეყნებისთვის არის გათვლილი.

რა გვერდითი ეფექტები აქვს გრიპის აცრას?

სეზონური გრიპის აცრის შემდგომ შესაძლოა აღინიშნოს უმნიშვნელო თავის ტკივილი, ოფლიანობის მომატება, ცხელება, ზოგადი სისუსტე, დაღლილობის განცდა — თითოეული შესაძლო გვერდითი ეფექტი მაქსიმუმ ორ დღეში გაივლის ყოველგვარი დამატებითი ჩარევის გარეშე. ასევე შესაძლოა განვითარდეს ადგილობრივი ალერგიული რეაქცია: ნანემსარის ირგვლივ სიწითლე, ტკივილი, შესიება. უმრავლეს შემთხვევაში ინფლუვაკს გავლენა არ აქვს ავტომობილის მართვისას მძღოლის რეაქციაზე. ძალზე იშვიათ შემთხვევებში მოსალოდნელია რეაქციის უმნიშვნელო შენელება.

როდის არ შეიძლება გრიპის აცრის გაკეთება?

გრიპის აცრა არ კეთდება იმ შეთხვევაში, თუ მის შემადგენელ კომპონენტებზე ადამიანს ალერგიული რეაქცია აქვს. მაგ: ინფლუვაკის ვაქცინა კვერცხის ცილის კომპონენტებს შეიცავს. ვაქცინაცია არ კეთდება მწვავე ინფექციური დაავადებებისა და სხეულის მაღალი ტემპერატურის არსებობის პირობებში

აუცილებლად უთხარი ექიმს თუ ალერგიული ხარ!

შეიძლება გრიპის აცრის გაკეთება ორსულობისას?

რა თქმა უნდა. ვაქცინაცია უსაფრთხოა ორსულობის ნებისმიერ ვადაზე. იგი ასევე სრულიად უსაფრთხოა მეძუძური დედებისთვის და მას არავითრი გავლენა არ აქვს რეპროდუქციულ სისტემაზე.

უსაფრთხოა თუ არა აცრის გაკეთება?

გრიპის აცრა სრულიად უსაფრთხოა! მის მიერ მოტანილი სარგებელი მნიშვნელოვნად აღემატება მის შესაძლო გვერდით ეფექტებს.

სად შეიძლება აცრის გაკეთება?

საზოგადოების მაღალი მოთხოვნის პირობებში ვაქცინაცია ჯერ მხოლოდ კერძო იმუნიზაციის ცენტრებსა და კლინიკებში მიმდინარეობს. ასევე შესაძლებელია ვაქცინის შეძენა აფთიაქებში. სახელმწიფო პროგრამით სეზონური გრიპის ვაქცინაცია ოქტომბრის ბოლოს/ნოემბრის დასაწყისში დაიწყება.

ვინ აიცრება უფასოდ?

სახელმწიფო პროგრამით წელს დაახლოებით 100 000 ვაქცინა განსაკუთრებით მაღალი რისკის ჯგუფებისთვის სრულიად უფასო იქნება. როგორც წესი, მაღალ რისკ-ჯგუფებში მოიაზრებიან: ქრონიკული დაავადებების მქონე ადამიანები, იმუნოკომპრომეტირებული პირები, სამედიცინო პერსონალი, ორსულები. უფრო ზუსტად აღნიშნულის შესახებ ოქტომბრის ბოლოს გახდება ცნობილი.

რა ღირს ვაქცინა/აცრის გაკეთება?

ვაქცინის ფასი დამოკიდებულია შემომტან ფარმაკოლოგიურ კომპანიაზე და აცრის გაკეთების ღირებულება კი კერძო კლინიკაზე. ვაქცინის/ვაქცინაციის საშუალო ღირებულება 40 ლარს აღწევს.

გახსოვდეს: თვითმკურნალობა ანტიბიოტიკებით კატეგორიულად დაუშვებელია! გრიპის სიმპტომების გამოჩენისთანავე მიმართე ექიმს!