ევროპული საქართველოს წევრი, გიგა ბოკერია ამბობს, რომ კომუნიკაციების ეროვნული კომისიის წევრი გიორგი ფრუიძე არ უნდა იყოს. ფრუიძეს ინტერესთა კონფლიქტი აქვს, ის რუსთავი 2-ის წამყვანის, ნათია ლაზაშვილის ქმარია. სწორედ კომისიის კომპეტენციაში შედის ტელევიზიების დარღვევებზე რეაგირება.

"ეს არის დარღვევა და ასეთი პირი არ უნდა იყოს მარეგულირებელში. აუცილებლად დავაყენებთ ამ საკითხს", — უთხრა ბოკერიამ On.ge-ს.

მაუწყებლობის შესახებ კანონით (მუხლი 11), კომისიის წევრს ინტერესთა კონფლიქტი აქვს, თუ მისი ოჯახის წევრი ანაზღაურებად საქმიანობას ასრულებს იმ პირისთვის, რომელიც კომუნიკაციების კომისიის რეგულირების სფეროში შედის.

On.ge-ს თავად ფრუიძემაც რამდენიმე დღის წინ დაუდასტურა, რომ თუ ნათია ლაზაშვილი წაიყვანდა კურიერს ინტერესთა კონფლიქტი ექნებოდა. ინტერესთა კონფლიქტის შემთხვევაში პარლამენტს შეუძლია კომისიის წევრის იმპიჩმენტის საკითხი დაიწყოს.

25 სექტემბერს ერთ თვეზე მეტი გავიდა მას შემდეგ, რაც კურიერი ეთერში არ გასულა. 21 აგვისტოს არხი პროტესტის ნიშნად დატოვა ჟურნალისტების უმრავლესობამ. ამას წინ უსწრებდა ქიბარ ხალვაშის მიერ რუსთავი 2-დან საინფორმაციო სამსახურის უფროსის, ნოდარ მელაძის გათავისუფლება. მისივე გადაწყვეტილებით არხმა ხელშეკრულება შეუწყვიტა საზოგადოებრივი და პოლიტიკური ტოქ-შოუს მთავარ პროდიუსერს, გიორგი ლაფერაშვილს; პოლიტიკური გადაცემების წამყვანებს, გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს, ნანუკა ჟორჟოლიანს.