რუსთავი 2-ის მთავარი საინფორმაციო გამოშვების წამყვანის, ნათია ლაზაშვილის ქმარი, გიორგი ფრუიძე საქართველოს კომუნიკაციების ეროვნული კომისიის წევრია. მხოლოდ კომუნიკაციების ეროვნული კომისიას შეუძლია ტელევიზიის დაჯარიმება, თუ კანონმდებლობით გათვალისწინებულ ვალდებულებებს არ შეასრულებს.

მაუწყებლობის შესახებ კანონით (მუხლი 11), კომისიის წევრს ინტერესთა კონფლიქტი აქვს, თუ მისი ოჯახის წევრი ანაზღაურებად საქმიანობას ასრულებს იმ პირისთვის, რომელიც კომუნიკაციების კომისიის რეგულირების სფეროში შედის.

"ამ შემთხვევაში თუ ნათია ლაზაშვილი იღებს ხელფასს კურიერის წამყვანის პოზიციაზე მუშაობისთვის, კომუნიკაციების ეროვნული კომისიის წევრს, გიორგი ფრუიძეს დაკავებულ თანამდებობაზე ექნება ინტერესთა კონფლიქტი. ვფიქრობთ, რომ იმ შემთხვევაშიც ჩნდება გარკვეული კითხვის ნიშნები, თუ ნათია ლაზაშვილი შესრულებული სამუშაოსთვის ხელფასს არ იღებს", — განუცხადა On.ge-ს საქართველოს ახალგაზრდა იურისტთა ასოციაციის იურისტმა, მარიამ გოგოსაშვილმა.

On.ge-ს თავად ფრუიძემაც დაუდასტურა, რომ თუ ნათია ლაზაშვილი წაიყვანს კურიერს ინტერესთა კონფლიქტი იქნება. ინტერესთა კონფლიქტის შემთხვევაში პარლამენტს შეუძლია კომისიის წევრის იმპიჩმენტის საკითხი დაიწყოს.

დღეს, 25 სექტემბერს ერთ თვეზე მეტი გავიდა მას შემდეგ, რაც კურიერი ეთერში არ გასულა. 21 აგვისტოს არხი პროტესტის ნიშნად დატოვა ჟურნალისტების უმრავლესობამ. ამას წინ უსწრებდა ქიბარ ხალვაშის მიერ რუსთავი 2-დან საინფორმაციო სამსახურის უფროსის, ნოდარ მელაძის გათავისუფლება. მისივე გადაწყვეტილებით არხმა ხელშეკრულება შეუწყვიტა საზოგადოებრივი და პოლიტიკური ტოქ-შოუს მთავარ პროდიუსერს, გიორგი ლაფერაშვილს; პოლიტიკური გადაცემების წამყვანებს, გიორგი გაბუნიასა და ეკა კვესიტაძეს და გასართობი გადაცემის ავტორსა და წამყვანს, ნანუკა ჟორჟოლიანს.