მოძრაობა #სირცხვილიას საპროტესტო აქცია "ერთად ერთის წინააღმდეგ" თბილისთან ერთად ბათუმშიც გაიმართება. აქცია დღეს, 20 სექტემბერს, ევროპის მოედანზე, 19:00 საათზე დაიწყება.

"დღეს კიდევ ერთხელ ვიტყვით, რომ გვინდა დასავლური ღირებულებები, ევროატლანტიკური ინტეგრაცია და უარს ვამბობთ რუსულ გავლენაზე; რომ გვინდა კანონის უზენაესობა და სამართლიანი სასამართლო სისტემა; რომ გვინდა ხალხის წინაშე ანგარიშვალდებული მთავრობა; რომ გვინდა, დასრულდეს ბიძინა ივანიშვილის არაფორმალური მმართველობა; და ჩვენ გვაქვს ჩვენი გენგეგმა", — ნათქვამია ღონისძიების აღწერაში.

თბილისში აქცის რუსთაველის გამზირზე, პარლამენტის წინ 19:00 საათზე დაიწყება. დღევანდელის შემდეგ პარლამენტთან აქციები შეწყდება და მოძრაობის წევრები შეხვედრებს რეგიონებში გამართავენ.

#სირცხვილია და 20 ივნისის აქცია

სამოქალაქო პროტესტი რუსი დეპუტატის სერგეი გავრილოვის საქართველოში ვიზიტმა და პარლამენტის თავმჯდომარის სკამიდან რუსულ ენაზე განცხადების გაკეთებამ გამოიწვია. შედეგად, გავრილოვმა საქართველო დატოვა, პარლამენტის თავმჯდომარე გადადგა. რუსეთმა საქართველოს "დასჯა განიზრახა" და სანქციების ბერკეტი აამოქმედა: რუსულ ავიახაზებს საქართველოში ფრენა აუკრძალა, რამდენიმე ღვინის ექსპორტიორი კომპანია დაბლოკა და აქციები "რუსოფობიად" მოიხსენია. ამის პარალელურად, დიპლომატიურმა კორპუსმა და მოქალაქეებმა ტურისტების მოზიდვის მიზნით დაიწყეს კამპანია #spendyoursummeringeorgia.

პარლამენტის თავმჯდომარის გადადგომას წინ უსწრებდა 20 ივნისის ღამე, როცა შსს-ს სპეციალურმა რაზმმა აქცია ძალის გამოყენებით რეზინის ტყვიებით, ცრემლსადენი გაზითა და წყლის ჭავლით დაშალა. მათი პოზიციით, იგეგმებოდა საქართველოს პარლამენტზე, როგორც ინსტიტუტზე შტურმი და დამხობა. დაშლის დროს დაშავდა ასობით ადამიანი, მათგან ორმა თვალი დაკარგა. აქციის მონაწილეები აქციებს შს მინისტრის, გიორგი გახარიას გადადგომის მოთხოვნით მართავდნენ, თუმცა, ქართულმა ოცნებამ ის 3 სექტემბერს პრემიერ-მინისტრობის კანდიდატად წარადგინა. ამ დღიდან კი აქციაზე გახარიას პრემიერად წარდგენას აპროტესტებენ.