თბილისის მერი კახა კალაძე თიბისის დამფუძნებლების მიერ პოლიტიკური პარტიის დაფუძნებას გამოეხმაურა და თქვა, რომ ქართული ოცნება მათ რაიმე განსაკუთრებულ კონკურენტებად არ აღიქვამს. ამის შესახებ კახა კალაძემ დღეს, 10 სექტემბერს ჟურნალისტებთან საუბრისას თქვა:

"ყველა პოლიტიკურ პარტიას აღვიქვამ კონკურენტად, მამუკა ხაზარაძეს ვერ გამოვყოფდი განსაკუთრებულად, ჩვეულებრივ პოლიტიკურ პარტიას შექმნის, როგორც ხდება ხოლმე ბევრი გვინახავს ჩვენ ასეთ პარტიები".

მამუკა ხაზარაძემ საზოგადოებრივი მოძრაობის დაფუძნება 9 ივლისს დააანონსა. ხაზარაძის თქმით, ქვეყანაში ბოლო დროს მიმდინარე პროცესები საგანგაშო ფორმებს იღებს, სახეზეა ჩვენი საზოგადოების გახლეჩვისა და დაპირისპირების მიზანმიმართული პროცესი. მისივე თქმით, 20 ივნისის ღამე იყო ის წყალგამყოფი, როდესაც "ჩვენმა ღირსეულმა და თავისუფალმა ახალგაზრდობამ გულწრფელი და მტკიცე პროტესტი გამოხატა ოკუპაციისა და ძალადობის წინააღმდეგ. ეს პროტესტი არის უწყვეტი, ისტორიული პროცესისა და ჩვენი ქვეყნის დამოუკიდებლობისთვის ბრძოლის გაგრძელება".

ხაზარაძემ აღნიშნა, რომ სწორედ დღეს არის საჭირო ჯანმრთელი, პროგრესული და პროდასავლური საზოგადოების კონსოლიდაცია და გაერთიანება, რადგან მისივე განცხადებით, ცხადია, რომ არსებული ვითარების დეესკალაცია და სამოქალაქო მშვიდობის მიღწევა მხოლოდ ხელისუფლების ან პოლიტიკური პარტიების ძალისხმევით პრაქტიკულად შეუძლებელი ხდება.