საქართველოს იუსტიციის საბჭოს გვერდზე უზენაესის მოსამართლეობის კანდიდატების მიერ დაგროვებული ქულების ოდენობა გამოქვეყნდა.იუსტიციის უმაღლესი საბჭოს წევრებმა კანდიდატების კეთილსინდისიერება და კომპეტენცია შეაფასეს. კეთილსინდისიერებაში ყველაზე მაღალი ქულა 1200 იყო, საბჭოს თითოეულ წევრს კანდიდატის მაქსიმუმ 100 ქულით შეფასება შეეძლო.

48 მოსამართლეობის კანდიდატიდან კომპეტენციაში ყველაზე მაღალი 1 132 ქულა მაია ვაჩაძემ მიიღო. ის უზენაესი სასამართლოს მოქმედი მოსამართლეა და ერთ-ერთია უზენაესის დიდი პალატის იმ შემადგენლობიდან, რომელმაც რუსთავი 2 ქიბარ ხალვაშს მიაკუთვნა. ის უზენაეს სასამართლოში მოსამართლე მიხეილ ჩინჩალაძის დროს მუშაობდა. იუსტიციის საბჭოში გასაუბრების დროს თქვა, რომ დაახლოებით 10 წლის განმავლობაში უზენაესი სასამართლოს ადმინისტრაციულ პალატას მიხეილ ჩინჩალაძე ხელმძღვანელობდა, თუმცა ვაჩაძის განმარტებით, ჩინჩალაძის გავლენის ქვეშ არ იყო და არც ახლა არის. მისი თქმით, "მოსამართლის უფროსი საკუთარი თავია".

კომპეტენციაში ყველაზე დაბალი ქულა, 797 უზენაესი სასამართლოს ყოფილმა მოსამართლემ თამარ ლალიაშვილმა მიიღო. ის ერთ-ერთია ე.წ. მეამბოხე მოსამართლეებიდან. მეამბოხე მოსამართლეების სახელით ცნობილი საქმე იმ პერიოდს უკავშირდება, როცა მურუსიძე უზენაესი სასამართლოს კოლეგიის წევრი იყო. ნაციონალურმა მოძრაობამ ხელისუფლებაში მოსვლის შემდეგ ღიად დააფიქსირა სასამართლო ხელისუფლების გადახალისების სურვილი. მათ მოსამართლეებს სოციალური გარანტიების შეთავაზებით თანამდებობის დატოვებისკენ მოუწოდეს. ნაწილი შეთავაზებას დათანხმდა, ნაწილმა პოსტი ნებაყოფლობით არ დატოვა. მათ მიმართ წინასწარ გაცხადებული "დისციპლინური ომი" დაიწყო. მას სასამართლო 2006 წელს დაატოვებინეს. ლალიაშვილმა სტრასბურგის სასამართლოში იჩივლა და მოიგო. ის სასამართლოს თემებზე მომუშავე არასამთავრობო ორგანიზაციებთან ერთად ე.წ. კლანის არსებობაზე ხმამაღლა საუბრობდა, მოითხოვა მოსამართლე ლევან მურუსიძისა და იუსტიციის საბჭოს არსებული შემადგენლობის გათავისუფლებას.

მოსამართლეობის კანდიდატების ქულები — სრული სია

ბოლო ინფორმაციით, კანდიდატურა მოხსნა მოსამართლე ლევან თევზაძემ, რომელიც იუსტიციის საბჭოს მოსამართლე წევრის ირაკლი შენგელიას ცოლის ძმაა.

იუსტიციის უმაღლესი საბჭო უზენაესი სასამართლოს მოსამართლეობის კანდიდატთა 20-კაციანი სიის შესარჩევად ორ კენჭისყრას ხვალ, 4 სექტემბერს ჩაატარებს. კანონის მოხედვით, საბჭო 48-კაციანი სიიდან ფარული კენჭისყრით შეარჩევს 20 კანდიდატს, ამის შემდეგ კი, მონაცემები საბჭოს ვებგვერდზე გამოქვეყნდება.

კანონის თანახმადვე, საბჭოში კიდევ ერთი კენჭისყრა უნდა ჩატარდეს, რომლის მიხედვითაც, სათითაოდ ეყრება კენჭი შერჩეულ 20 კანდიდატს, იმის გასარკვევად, უნდა წარედგინოს თუ არა მისი კანდიდატურა საქართველოს პარლამენტს. კანდიდატი წარდგენილად ჩაითვლება, თუ მას საბჭოს ღია სხდომაზე, ფარული კენჭისყრით მხარს დაუჭერს საბჭოს სრული შემადგენლობის არანაკლებ ორი მესამედი.