მამუკა ბახტაძე ამბობს, რომ პრემიერ-მინისტრის თანამდებობის დატოვების შემდეგ აქტიურ პოლიტიკაში დარჩენის შინაგანი განწყობა არ აქვს. მისივე განცხადებით, ქართული ოცნების პოლიტიკური საბჭოს წევრები იქნება.

"მე ვიქნები ჩვენი პარტიის პოლიტიკური საბჭოს წევრი და თუ ჩემი პირადი მოსაზრება გაინტერესებთ ჩემი შინაგანი განწყობა არ არის, რომ მე ვიყო აქტიური პოლიტიკით დაკავებული, რა თქმა უნდა, აქვს გუნდს თავის მოსაზრება, რასაც მე პატივს ვცემ და მე მინდა ხაზი გავუსვა მთავარს, მე საჯარო პოლიტიკაში შემოვედი კონკრეტული მიზნით და ამოცანით, რომლის რეალიზაციაც მოხდა", — განაცხადა მამუკა ბახტაძემ.

მამუკა ბახტაძემ გადადგომის შესახებ ფეისბუქზე ვრცელი პოსტი გამოაქვეყნა. მან მიმოიხილა თავისი პრემიერმინისტრობის პერიოდი და "5 პრინციპი, რომელიც მთავრობის მთავარ ქვაკუთხედად ჩამოაყალიბა". ბახტაძემ თქვა, რომ მისია შეასრულა და თანამდებობის დატოვების შესახებ კონსულტაციებს პარტიის თავმჯდომარესთან, ბიძინა ივანიშვილთან გაზაფხულიდან გადიოდა.

მამუკა ბახტაძე ქართული ოცნების მმართველობის პერიოდში მეოთხე პრემიერ-მინისტრი იყო. მანამდე 8 თვე ის ფინანსთა მინისტრად მუშაობდა. პოლიტიკაში მოსვლამდე 5 წლის განმავლობაში ის საქართველოს რკინიგზის გენერალური დირექტორი იყო.

განათლება და სამუშაო გამოცდილება

ბახტაძე ტექნიკურ მეცნიერებათა დოქტორია. ის სწავლობდა მენეჯმენტსა და მიკროეკონომიკას თბილისის სახელმწიფო უნივერსიტეტში, ელექტრომექანიკურ ინჟინერიას ტექნიკურ უნვიერსიტეტში. მას მიღებული აქვს განათლება მოსკოვშიც, კერძოდ 2005 წელს მან ლომონოსოვის უნივერსიტეტის ბიზნესის უმღალესი სკოლის მაგისტრის ხარისხი მიიღო.

საქართველოში კარიერა ბახტაძემ 2006 წელს საქართველოს რკინიგზაში პროექტების მენეჯერად დაიწყო. 2007-დან 2008 წლამდე სასტუმროების ქსელ რჩეულის სამეთვალყურეო საბჭოს წევრი იყო, 2010-2012 წლებში საქართველოს საერთაშორისო ენერგეტიკული კორპორაციის გენერალური დირექტორის, ხოლო 2013 წლიდან ფინანსთა მინისტრობამდე საქართველოს რკინიგზის გენერალური დირექტორის პოსტს იკავებდა.