დღეს, 5 მაისს, პარლამენტის ადამიანის უფლებათა დაცვისა და სამოქალაქო ინტეგრაციის კომიტეტმა კონსტიტუციაში ცვლილების შეტანის კანონპროექტს მხარი დაუჭირა.

კანონპროექტის თანახმად, კონსტიტუციაში ქორწინება განისაზღვრება, როგორც ქალისა და მამაკაცის ნებაყოფლობითი ერთობა. ინიციატივას კომიტეტის წევრების უმრავლესობამ დაუჭირა მხარი, მხოლოდ ერთმა შეიკავა აზრის დაფიქსირებისგან თავი.

კანონპროექტის თანახმად, კონსტიტუციის 36-ე მუხლის 1-ელ პუნქტში ქორწინების ცნება უნდა განისაზღვროს. ამჟამინდელი კონსტიტუციის მიხედვით, ქორწინება ემყარება მეუღლეთა უფლებრივ თანასწორობასა და ნებაყოფლობას. კანონპროექტის თანახმად კი, იგი შესაძლოა ჩამოყალიბდეს, როგორც ქორწინება, რომელიც არის ოჯახის შექმნის მიზნით ქალისა და მამაკაცის ნებაყოფლობითი კავშირი და ემყარება მეუღლეთა უფლებრივ თანასწორობას.

ცვლილებების ინიციატორი პარლამენტის 80 წევრია, დასამტკიცებლად კი 113 დეპუტატის ხმა იქნება საჭირო.