ხელვაჩაურის რაიონულმა სასამართლომ ცოლსა და შვილებზე ძალადობაში ბრალდებული კაცი დამნაშავედ სცნო და ოთხი წლით თავისუფლების აღკვეთა მიუსაჯა.

გამოძიების ინფორმაციით, 2016 წლის დეკემბრიდან 2019 წლის თებერვლამდე ბრალდებული არასრულწლოვანი შვილების თანდასწრებით სისტემატიურად სცემდა და ძალადობდა ცოლზე. გარდა ამისა, გინებით, დამამცირებელი სიტყვებით სისტემატურად აშანტაჟებდა, შეურაცხყოფდა და ამცირებდა ცოლს და არასრულწლოვან შვილებს. როგორც პროკურატურაში აცხადებენ, სისტემატიურმა ცემამ და ძალადობამ, დაზარალებულების ფიზიკური ტკივილი, ჯანმრთელობის მსუბუქი დაზიანება, ფსიქიკური ტანჯვა და ფსიქოლოგიური ტრავმა გამოიწვია.

ბრალდების მხარე ასევე აცხადებს, რომ 2019 წლის 20 იანვარს კაცმა ერთ-ერთი კონფლიქტისას ბავშვების თანდასწრებით ერთ-ერთ შვილი სცემა, ხოლო გასაშველებლად ჩარეულ ცოლს გულ-მკერდის არეში ხელი დაარტყა.

სამართალდამცველებმა ბრალდებული ხელვაჩაურის მუნიციპალიტეტში 2019 წლის 3 თებერვალს დააკავეს. მას ბრალდება წარედგინა საქართველოს სისხლის სამართლის კოდექსის 11'-126-ე მუხლის მე-2 ნაწილის "კ" ქვეპუნქტით (არასრულწლოვნების თანდასწრებით მისივე ოჯახის წევრის მიმართ სისტემატური ცემა და სხვაგვარი ძალადობა, რამაც დაზარალებულის ფიზიკური და ფსიქიკური ტანჯვა გამოიწვია), 1261-ე მუხლის მე-2 ნაწილის "ა, ბ, გ" ქვეპუნქტებით (ორი ან მეტი პირის, ასევე არასრულწლოვნების მიმართ და არასრულწლოვნების თანდასწრებით მათივე ოჯახის წევრის მიმართ ოჯახში ძალადობა, სისტემატური შეურაცხყოფა, შანტაჟი და დამცირება) და 1261-ე მუხლის მე-2 ნაწილის "ა, ბ, გ" ქვეპუნქტებით (ორი პირის მიმართ, არასრულწლოვნის მიმართ და არასრულწლოვნების თანდასწრებით ოჯახის წევრების მიმართ ძალადობა, რამაც ფიზიკური ტკივილი გამოიწვია).