გამომძიებელ ჟურნალისტთა გაერთიანება აი, ფაქტის ინფორმაციით, გორში, რკინიგზის დასახლებაში ერთ საბავშვო ბაღს უკვე ორი წელია აშენებენ. როგორც საგამოძიებო მასალაში წერია, მშენებელმა კომპანიამ თავისი ვალდებულებები არ შეასრულა, მთავრობამ კი ის სათანადოდ არ დააჯარიმა. პროექტზე უკვე 90 ათასი ლარია დახარჯული.

ბაღის მშენებლობა აზერბაიჯანული კომპანიის ფილიალმა, ინშაათ საქართველომ 2017 წლის ზაფხულში დაიწყო და იმავე წლის ნოემბერში უნდა დასრულებულიყო. პროექტის ღირებულება 530 ათას ლარს აღწევდა. კომპანიამ სამუშაოების ვადა მერიას რამდენჯერმე გადააწევინა, საბოლოოდ, ბაღი 2018 წლის მარტში უნდა ყოფილიყო მზად.

"მშენებლობის პროცესში აღმოჩნდა, რომ გამოყენებული ბეტონის ხარისხი ორჯერ ჩამოუვარდებოდა სტანდარტს. მიუხედავად ამისა, კომპანია არც დაჯარიმდა და არც კონტრაქტი შეუწყდა. მერიასთან და სამუშაოების ზედამხედველ კომპანიასთან ერთად ინშაათ საქართველომ არსებული საძირკვლის გამაგრება დაიწყო, თუმცა სამუშაოები საძირკველს ვერ გასცდა", — წერს აი, ფაქტი.

გორის მერიამ ინშაათ საქართველოს კონტრაქტი 2018 წლის აპრილში შეუწყვიტა. გორის მერიამ სახელმწიფო შესყიდვების სააგენტოსგან ითხოვა, რომ კომპანია ე.წ. შავ სიაში შეეყვანათ, თუმცა სააგენტომ მერიის მოთხოვნა არ შეასრულა. ჟურნალისტების კითხვაზე, უპასუხისმგებლო კომპანიის შავ სიაში შესაყვანად რატომ არ იჩივლა მერიამ სასამართლოში, სივრცითი მოწყობისა და ინფრასტრუქტურის სამსახურის უფროსის მოადგილე, ტარიელ მაისურაძემ უპასუხა:

"ეს პროცესი რამდენი ხანი უნდა გაგრძელებულიყო და მშენებლობა როდის უნდა დამეწყო? თუ ეს დავა არ მორჩებოდა, მშენებლობა შეიძლებოდა გამგრძელებოდა ორი-სამი წელი? ჩემი ინტერესი ის იყო, რომ მშენებლობა დასრულებულიყო მალე".

აი, ფაქტის ინფორმაციით, მერიამ ახალი საპროექტო დოკუმენტაცია შექმნა და ტენდერი 2019 წლის ივლისში გამოაცხადა. ამ შემთხვევაში, მშენებლობის დასასრულებლად კომპანიას 1,1 მილიონი ლარი და ორი წელი მიეცემა. ტენდერში ორი კომპანია მონაწილეობდა. იმას, რომელმაც დაბალი ფასი შესთავაზა და გამარჯვების მეტი შანსი ჰქონდა, მერიის სატენდერო კომისიამ დისკვალიფიკაცია მისცა.