საქართველოში თითქმის შეუძლებელია ისეთი ადამიანის მოძებნა, რომელსაც სერიალი დინასტია ნანახი თუ არა, გაგონილი მაინც რომ არ ჰქონდეს.

წლების წინ სწორედ ამ სერიალის ეთერში გასვლის დროზე იყო დამოკიდებული რომელ საათზე მოვიდოდა შუქი, ამ სერიალმა შეუცვალა ქართველი ქალების უმეტესობას ვარცხნილობა და სალონები ფულს ქრისთლი ქერინგტონის ხარჯზე შოულობდნენ, აქტუალური იყო ელექსისი ტანისამოსი და, რა თქმა უნდა, სახლი, სადაც ქერინგტონების საგვარეულო ცხოვრობდა და სადაც 220 დღის განმავლობაში ვცხოვრობდით.

ამერიკული კომპანია CW ერთ-ერთი ყველაზე გახმაურებული და პოპულარული სერიალის ახალ ვერსიას შემოგვთავაზებს, ამიტომ სანამ ახალი ვერსია დღის სინათლეს იხილავს, მოდით გავიხსნოთ ჩვენი საყვარელი პერსონაჟები და ვნახოთ რას საქმიანობენ ისინი დღეს.

ჯონ ფორსატი - ბლეიქ ქერინგტონი

ჯონი ამერიკული კინოს, ტელევიზიის, თეატრისა და რადიოს ერთ-ერთი პიონერი იყო. დინასტიის შედეგ მან კამერონ დიასთან, ლიუსი ლუსთან, დრიუ ბერიმორთან და ბილ მიურეისან ერთად ითამაშა ფილმში ჩარლის ანგელოზები. ბლეიქ ქერინგტონის როლმა მას ორი ოქროს გლობუსი მოუტანა. მსახიობი 2010 წელს 92 წლის ასაკში გარდაიცვალა.

ლინდა ევანსი - ქრისთლი ქერინგტონი

ლინდა დღეს 73 წლის არის, 1997 წლის შემდეგ, ყველა როლზე, ფილმსა თუ სერიალში, უარს ამბობს. 2009 წელს კი ერთ-ერთ ბრიტანულ არხზე კულინარიული გადაცემა მიჰყავდა.

ჯოან კოლინზი - ელექსის კოლბი

83 წლის ჯოან კოლინსი დღესაც ერთ-ერთი ყველაზე მოთხოვნადი მსახიობია. დინასტიის შემდეგ ითამაშა ისეთ სერიალებში როგორიც არის ფეხბურთელების ცოლები და ცუდი გოგოები. აღსანიშნავია, რომ დინასტიის დროს სამსახიობო ანსამბლში ყველაზე მაღალი ანაზღაურება მას ჰქონდა და ეპიზოდში $120 ათასს იღებდა. თითქმის ყოველ წელს გამოდის ახალი ფილმი მისი მონაწილეობით და თამაშობს რომელიმე სერიალში მიწვეულ მსახიობად. წერს წიგნებს, რომელთა გაყიდვებიდან მიღებული შემოსავალი რამდენიმე მილიონ დოლარს აჭარბებს და დღეს ერთ-ერთ ყველაზე მდიდარ ქალ მსახიობად ითვლება ბრიტანეთში. აქტიურია სოციალურ ქსელშიც და იყენებს ფეისბუქს, თვითერსა და ინსტაგრამს.
აღსანიშნავია, რომ თავის დროზე დინასტიაში ჯოან კოლინზმა სოფია ლორენი შეცვალა, რომელმაც ელექსისის როლზე უარი თქვა.

პამელა სიუ მარტინი - ფელონ ქერინგტონ კოლბი

63 წლის პამელა დღეს მთლიანად ოჯახზეა გადართული და 6 შვილიშვილს უვლის. პარალელურად წერს ავტობიოგრაფიულ წიგნს. პამელა 1985 წელს სერიალიდან წავიდა და ის იმ დროის ერთ-ერთი ყველაზე პოპულარული სერიალის ცენტრალური საავადმყოფოს ვარსკვლავმა ემა სიმსმა ჩაანაცვლა.

ემა სიმსი - ფელონ ქერინგტონ კოლბი

სანამ ემა დინასტიაში მოვიდოდა და პამელა სიუ მარტინს შეცვლიდა ფელონის როლზე, ის ცენტრალური საავადმყოფოს ვარსკვლავი იყო და ასე გაგრძელდა 2015 წლამდე, სანამ სერიალიდან წამოსვლა არ გადაწყვიტა.

ალ ქარლაი - სტივ ქერინგტონი

სტივი ქართველ მაყურებელს განსაკუთრებულად ემახსოვრება, რადგან ის საქართველოში გასულ სერიალებში პირველი გეი პერსონაჟი იყო. რაც შეეხება ალს ის ამჟამად პროდიუსერად მუშაობს.

ჯეკ კოულმანი - სტივ ქერინგტონი

ჯეკ კოულმანმა ალ ქარლაი სტივ ქერინგტონის როლზე შეცვალა. მოგვიანებით კი, ის, ფენტეზის ჟანრის მაყურებელმა სერიალ გმირებში თავიდან აღმოაჩინა. ის მონაწილეობას იღებდა ისეთ შოუებში როგორებიცაა - სკანდალი, დანაშაულის ადგილი და სხვა.

კეტრინ ოქსენბერგი - ამანდა ქერინგტონი

კეტრინი, არც მეტი, არც ნაკლები, იუგოსლავიის პრინცესა ელისაბედის ქალიშვილია. მიუხედავად იმისა, რომ დინასტიის შემდეგ მან რამდენიმე ფილმსა და სერიალში ითამაშა ამერიკული საპნის ოპერა მისი კარიერის ყველაზე პოპულარული შოუა.

ჯონ ჯეიმსი - ჯეფ კოლბი

ჯონი ამჟამად ერ-ერთი საპროდიუსერო ფირმის თანამშრომელია და პარალელურად პატარ-პატარა როლებს ასრულებს ფილმებში.

ჰეიზერ ლუკლერი - სამანტა ჯოზეფინა ქერინგტონ ფალმონტი

მიუხედავად იმისა, რომ ჰეიზერის ფილმოგრაფია მრავალრიცხოვანია, რაოდენობამ არ მოგატყუოთ, მისი როლები დროსთან ერთად უფრო და უფრო უმნიშვნელო ხდება.

სერიალი დინასტია ამერიკაში 35 წლის წინ გამოვიდა და ის ეთერში 9 წლის განმავლობაში გადიოდა. სერიალს ერთნაირი ყურადღებით უყურებდნენ როგორც ოკეანის გადაღმა, ასევე რუსეთში, ბრიტანეთში, გერმანიაში, საფრანგეთში, ესპანეთში, საქართველოსა და კიდევ რამდენიმე ათეულ ქვეყანაში. სულ მალე კი CW ახალ ქრისთლის, ელექსსისა და ბლეიქს გაგვაცნობს.