საქართველოს პრეზიდენტი, სალომე ზურაბიშვილი ამბობს, რომ პრეზიდენტი მუდმივად სხვის მიერ დაგეგმილ პროვოკაციებზე არ უნდა რეაგირებდეს. კონსტიტუციის მიღების დღესთან დაკავშირებით გამართულ ღონისძიებაზე ზურაბიშვილმა კიდევ ერთხელ აღნიშნა, რომ პრეზიდენტი სხვისი დღის წესრიგით არ უნდა მოქმედებდეს.

"დიახ, პრეზიდენტის მოვალეობაა, საზღვარი დაიცვას, საზღვარზე მივიდეს და ადგილზე გაეცნოს სიტუაციას და რაც მთავარია, ყველაფერი იღონოს, რომ ყველა ჩვენს მეზობელთან საზღვრები დადგინდეს. ამდენად, მოლაპარაკებების განახლება და ამ პროცესის დაჩქარება და მხარდაჭერა ზუსტად ჯდება პრეზიდენტის მოვალეობაში. რაც შეეხება საოკუპაციო ხაზს, პრეზიდენტი უნდა ზრუნავდეს იქ მცხოვრებ ჩვენს მოქალაქეებზე", — აღნიშნა პრეზიდენტმა.

გუგუტიანთკარში უკანონო ბორდერიზაციის პროცესი აგვისტოს ომის მე-11 წლისთავზე, 7 აგვისტოს დაიწყო და რამდენიმე დღეში შეწყდა. 15 აგვისტოს საოკუპაციო რეჟიმმა მუშაობა განაახლა. რუსი სამხედროებმა ე.წ. საზღვარი გაავლეს საქართველოს მოქალაქეების, რაზმაძეებისა და გუგუტიშვილების ნაკვეთებში. საოკუპაციო ხაზს მიღმა მოექცა მათი საცხოვრებელი სახლი, ყანები და სავარაუდოდ, წყლის რეზერვუარი. საოკუპაციო რეჟიმმა სამი დღე მისცა ადგილობრივებს, სახლების დასაცლელად. რაზმაძეების ოჯახმა სახლი მთლიანად დაშალა და საშენი მასალა გამოიტანა.

მოსახლეობა დახმარებას ითხოვდა, თუმცა პრეზიდენტი, პრემიერი, პარლამენტის თავმჯდომარე და გორის მერი სოფელში რამდენიმე დღე არ გამოჩენილან. როგორც გორის მერმა განაცხადა, სოფელში შვებულების დასრულების შემდეგ ჩავიდოდა. მოსახლეობა მერის ამ პასუხს კრიტიკულად შეხვდა. რაც შეეხება პრეზიდენტს ის სოფელში შვებულებიდან დაბრუნების შემდეგაც არ ჩასულა და განაცხადა, რომ როცა საჭიროდ ჩათვლიდა მომხდარის შეფასებას, ჟურნალისტებს თავად აცნობებდა.

პრემიერი და პარლამენტის თავმჯდომარე გუგუტიანთკარში ბორდერიზაციის დაწყებიდან ორ კვირაში, გვიან ღამით ჩავიდნენ. ისინი პრემიერი ესტუმრა მარღიშვილის ოჯახს, რომელმაც ის ტელევიზიით მიიწვია. თუმცა, როგორც On.ge-ს პრესსამსახურმა დაუდასტურა, ის არ შეხვედრია დაზარალებული გუგუტიშვილებისა და რაზმაძეების ოჯახებს.