"ის, როგორც მისი კოლეგა პრეზიდენტები დასვენების ადგილიდან აგრძელებდა მუშაობას", — ამის შესახებ პრეზიდენტის ადმინისტრაციამ სალომე ზურაბიშვილის შვებულებასთან დაკავშირებით განაცხადა. მათივე თქმით, ზურაბიშვილმა შვებულება თავის შვილებთან ერთად ქალაქგარეთ გაატარა.

"[პრეზიდენტი] კონტაქტში იყო თავის ადმინისტრაციასთან, საგარეო და შინაგან საქმეთა უწყებებთან და თავის უცხოელ კოლეგებთან. მოგეხსენებათ, თანამედროვე საკომუნიკაციო საშუალებებით ეს შესაძლებელი", — ნათქვამია ადმინისტრაციის განცხადებაში.

გუგუტიანთკარში უკანონო ბორდერიზაციის პროცესი აგვისტოს ომის მე-11 წლისთავზე, 7 აგვისტოს დაიწყო და რამდენიმე დღეში შეწყდა. 15 აგვისტოს საოკუპაციო რეჟიმმა მუშაობა განაახლა.

უკანონო ბორდერიზაციის პერიოდში არც სალომე ზურაბიშვილსა და არც პრეზიდენტის ადმინისტრაციას ოფიციალური განცხადება არ გაუკეთებიათ. მედიაში გავრცელებული ინფორმაციით, პრეზიდენტი ამ დროს შვებულებაში იყო და ლოპოტაზე ისვენებდა.

შვებულებიდან დაბრუნებისას სალომე ზურაბიშვილმა განაცხადა, რომ განცხადების გაკეთების შესახებ წინასწარ იტყვის:

"ყველაფრის შესახებ გაგაფრთხილებთ, როცა გადავწყვეტ განცხადების გაკეთებას ან სხვა უფრო სერიოზულ რამეს. მე ვიყავი გასულ კვირას, ვიცი ყველაფერი, რაც ხდება და ვაპირებთ, რომ... სერიოზულად მუშაობს მთავრობა და მეც ვარ ჩართული".