აშშ-ს პრეზიდენტი, დონალდ ტრამპი წინააღმდეგი არაა, თუ დიდ შვიდეულში რუსეთი დაბრუნდება. ეს პირველი შემთხვევა არაა, როცა ტრამპი მსგავსი წინადადებით გამოდის, თუმცა დიდი შვიდეულის ქვეყნები რუსეთის დაბრუნების წინააღმდეგი არიან.

"მიზანშეწონილია, რომ რუსეთი იქ იყოს. ეს უნდა იყოს დიდი რვიანი, რადგან ბევრი საკითხი, რომელსაც განვიხილავთ რუსეთს ეხება", — განაცხადა ტრამპმა რუმინეთის პრეზიდენტთან შეხვედრისას.

1997 წლიდან რუსეთი დიდი რვიანის სამიტებში აქტიურად იღებდა მონაწილეობას, თუმცა 2014 წელს ყირიმის ანექსიის გამო რუსეთი რვიანიდან გარიცხეს. ამის შემდეგ დიდი რვიანი დიდ შვიდეულად გადაკეთდა.

რამდენიმე დღის წინ რუსეთის პრეზიდენტმა, ვლადიმერ პუტინმა საფრანგეთის პრეზიდენტთან, ემანუელ მაკრონთან შეხვედრისას განაცხადა, რომ დიდი რვიანი აღარ არსებობს, ახლა არის მხოლოდ შვიდეული და რუსეთი მზადაა მასთან ითანამშროლოს. თვითონ მაკრონმა აღნიშნა, რომ დიდი რვიანის მუშაობის აღდგენა უკრაინის კრიზის დარეგულირებას უკავშირდება.

დიდი შვიდეულის სამიტი, რომელშიც საფრანგეთი, გერმანია, დიდი ბრიტანეთი, იტალია, კანადა, აშშ და იაპონია შედიან 24-26 აგვისტოს საფრანგეთში გაიმართება. წინა წლის სამიტზე ტრამპი სთავაზობდა შვიდეულს რუსეთის დაბრუნებას, თუმცა სხვა ქვეყნები ისევ წინააღმდეგი იყვნენ.