დღეს ამბროლაურში აეროპორტის ახალი ასაფრენ-დასაფრენი ზოლი გაიხსნა. ახლად გახსნილ ასაფრენ ბილიკზე დაშვებული საჰაერო ხომალდის პირველი მგზავრები ხელისუფლების წარმომადგენლები იყვნენ.

1 100-მეტრიან ასაფრენ-დასაფრენ ზოლს, რომლის სიგანე 30 მეტრია, შეზღუდვის გარეშე L 410 (19-ადგილიანი) ტიპის საჰაერო ხომალდების მიღება შეეძლება.

პირველი ვიცე-პრემიერის, დიმიტრი ქუმსიშვილის განცხადებით, აეროპორტის ამოქმედება მნიშვნელოვანია რაჭის განვითარებისთვის, განსაკუთრებით, ადგილობრივი ტურისტული სექტორისთვის.

პროექტის საინვესტიციო ღირებულება 10 000 000 ლარზე მეტს შეადგენს. ეკონომიკის სამინისტროს ინფორმაციით, მიმდინარე წლის ბოლოს ასევე დასრულდება ამბროლაურის აეროპორტის ტერმინალის მშენებლობა, რომელიც გათვლილია 50 მგზავრზე.

მხოლოდ ასაფრენ-დასაფრენი ზოლისა და სააეროდრომო ინფრასტრუქტურის მშენებლობისთვის შპს ბლექ სი გრუპის მიერ ადგილზე მობილიზებული იყო 60 ერთეულამდე სპეცავტოტექნიკა, ასევე დასაქმდა 125 ადამიანამდე, საიდანაც 75 ადამიანი ადგილობრივი მოსახლე იყო.