გახსოვთ ვარსკვლავი KIC 8462852? ეს კოსმოსური ობიექტია, რომელზეც ერთ-ერთი ყველაზე საოცარი ვერსია გავრცელდა. არსებობდა ვერსია, რომ ვარსკვლავს უცხოპლანეტური ცივილიზაციის მიერ აშენებული მეგასტრუქტურა ერტყა გარს. სამწუხაროდ, ამ ვერსიის დადასტურება ჯერ-ჯერობით შეუძლებელია და ცხადია, ეს თეორია კვლავ სამეცნიერო ფანტასტიკის ჟანრს მიეკუთვნება, მაგრამ ძალიან საინტერესოა და უცხოპლანეტელების ვისაც გვჯერა, მათთვის პატარა ნაპერწკალია.

წარმოიდგინეთ ცივილიზაცია, რომელიც იმ დონემდე განვითარდა, რომ ვარსკვლავს მიშენება გაუკეთა.

ერთ-ერთი ვერსიით, ეს მეგასტრუქტურა ენერგიას ვარსკვლავიდან იღებდა და სწორედ ამიტომ დასჭირდათ E.T.-ებს მისი აშენება. ამ ამბავს, ცხადია, სერიოზულად არავინ აღიქვამს, მაგრამ KIC 8462852 ასტრონომების შფოთვის საგანი კიდევ ერთხელ გახდა.

როგორც აღმოჩნდა, გედის თანავარსკვლავედში მდებარე, დედამიწიდან 1 480 სინათლის წელიწადით დაშორებული ეს ვარსკვლავი, სიკაშკაშეს კარგავს. ბოლო 6 თვეში KIC 8462852-მა სიკაშკაშის მთელი 2% დაკარგა, რაც ძალიან უცნაურია, რადგან ვარსკვლავების სიცოცხლის ხანგრძლივობა წარმოუდგენლად დიდია. შედარებისთვის, მზეს სიცოცხლისთვის დაახლოებით 10 მილიარდი წელი აქვს დარჩენილი.

ვარსკვლავის სიკაშკაშის ასეთი სისწრაფით დაკარგვას ასტრონომები ჯერ-ჯერობით ვერ ხსნიან.