წყვილმა, რომელიც ვუდსტოკზე 1969 წლის 15 აგვისტოს შეხვდა, 50 წლის შემდეგ იპოვა ფოტო, რომელიც მათი შეხვედრის პირველ საათებშია გადაღებული.

ჯუდი და ჯერი გრიფინები 50 წელია ერთად არიან. ისინი მთელი ცხოვრება უყვებიან მეგობრებსა და ოჯახის წევრებს, როგორ გაიცნეს ერთმანეთი ვუდსტოკის პირველი ფესტივალის პირველივე დღეს. თუმცა, მათ ამისი დამამტკიცებელი საბუთი არასდროს ჰქონიათ. უფრო ზუსტად კი იქამდე, სანამ ორი თვის წინ საკუთარი პირველი საერთო ფოტო არ აღმოაჩინეს.

1969 წლის აგვისტოში ჯუდი მუსიკალური ფესტივალის ტერიტორიიდან თითქმის 150 კილომეტრში იყო, როცა მანქანა გაუფუჭდა. მან ორ მეგობართან ერთად ფეხით განაგრძო გზა, თუმცა იცოდა, რომ ასე ვუდსტოკამდე ვერ მიაღწევდა.

სწორედ ამ დროს გამოჩნდა ჯერი მეგობრებთან ერთად მანქანით. როგორც ჯუდი იხსენებს, როცა მის მანქანაში ქალი დაინახა, ჩათვალა, რომ უცნობებთან ერთად მგზავრობა უსაფრთხო იქნებოდა.

"უსაყვარლესი გოგო იყო, რატომ უნდა მეთქვა უარი?" — იხსენებს ჯერი სიცილით.

1967 წლის ფოლქსვაკენ-ხოჭოთი რამდენიმესაათიანი მგზავრობა 50-წლიან სიყვარულში გადაიზარდა. მათ ახლა ორი შვილი და ხუთი შვილიშვილი ჰყავთ.

PBS-ზე ამ ზაფხულს გასულ დოკუმენტურ ფილმს სხვადასხვა ფოტოები მოჰყვებოდა ფესტივალიდან, მათ შორის იყო პლედში გახვეული წყვილი — წვიმაში დასველებული ჯუდი და მის წინ მდგომი ჯერი.

ფოტო: PBS

როგორც წყვილი იხსენებს, მათ ფესტივალზე კამერები ჰქონდათ, თუმცა სურათები არ გადაუღიათ და ეძებდნენ ფოტოგრაფების გადაღებულ სურათებს, სადაც თავს აღმოაჩენდნენ.

"ჩვენ ყოველთვის ვზეიმობთ 15 აგვისტოს, დღეს, როცა ვუდსტოკი დაიწყო და ჩვენ ერთმანეთი გავიცანით", — ამბობს ჯუდი.

წყვილმა 50 წლის შემდეგ მათი გაცნობის ფოტო გააცოცხლა.

ფოტო: BEN TRIVETT / People