სახალხო დამცველის, ნინო ლომჯარიას განცხადებით, რუსთავი 2-ის ყოფილი დირექტორის, ნიკა გვარამიას საქმესთან დაკავშირებით არსებობს კითხვები, ეს სისხლის სამართლის საქმეა თუ სამოქალაქო დავა. ამის შესახებ ლომჯარიამ გვარამიასთან შეხვედრის შემდეგ განაცხადა.

"ვფიქრობ, ძალიან მნიშვნელოვანია, რომ არსებობდეს სათანადო მტკიცებულებები და დასაბუთებული მსჯელობა იმასთან დაკავშირებით, რომ ეს კონკრეტული დავა წარმოადგენს სისხლის სამართლის განსჯადობის საკითხს. ვფიქრობ, რომ ამ საკითხთან დაკავშირებით პროკურატურამ უნდა წარმოადგინოს მეტი მტკიცებულებები... პროკურატურამ უნდა დაამტკიცოს განზრახვა, რაც აუცილებელია ამ ტიპის დანაშაულისთვის. ამ ეტაპზე, ჩემი წარმოდგენით და მოსაზრებით, საკმარისი მტკიცებულებები არ არსებობს განზრახვასთან დაკავშირებით", — თქვა ლომჯარიამ.

10 აგვისტოს რუსთავი 2-ის 9-პროცენტიანი წილის ყოფილი მფლობელის საჩივრის საფუძველზე სასამართლოში ნიკა გვარამიასთვის აღკვეთის ღონისძიების საკითხი განიხილებოდა. მოსამართლემ მიიჩნია, რომ ნაწილობრივ უნდა გაეთვალისწინებინა ბრალდების მხარის პოზიცია და გვარამიას 40 ათასლარიანი გირაო შეუფარდა და პროკურატურის ნებართვის გარეშე საზღვრის კვეთა აუკრძალა.

ნიკა გვარამიამ ბრალის წაყენების დროსაც და სასამართლო სხდომაზეც განაცხადა, რომ ის არ დაემორჩილებოდა აღკვეთის ღონისძიების არც ერთ სახეს და მისი დაპატიმრება მოუწევდათ.

აღკვეთის ღონისძიებაზე მსჯელობას წინ უსწრებდა 9 აგვისტოს ნიკა გვარამიასთვის ბრალის წაყენება. მას არხის დირექტორად მუშაობის დროს საზიანო გადაწყვეტილების მიღებას ედავებიან. გვარამიას წინააღმდეგ საჩივარი პროკურატურაში 16 ივლისს რუსთავი 2-ის 9-პროცენტიანი წილის ყოფილმა მფლობელმა, ნინო ნიჟარაძემ შეიტანა. ნიჟარაძე ტელეკომპანიის დირექტორის მიერ უფლებამოსილების ბოროტად გამოყენების მუხლით გამოძიების დაწყებას ითხოვდა.