დღეს ევროპის სახლში საქართველოს მედიის პროფესიული კავშირის (GMTU) პრეზენტაცია მოეწყო. შეხვედრას ესწრებოდნენ მედიის წარმომადგენლები, პროფესიული კავშირების გაერთიანების თავმჯდომარის მოადგილე, გოჩა ალექსადრია და თბილისის სოლიდარობის ქსელის წარმომადგენლები.

პრეზენტაციაზე მედიის პროფესიული კავშირის თავმჯდომარემ, ლაშა მესხმა განაცხადა, რომ ეს არის პროგრესული, პროდასავლური და მედიის სფეროში დასაქმებული ადამიანების შრომის უფლებებზე ორიენტირებული ძალა. მან აღნიშნა, რომ მომდევნო მოწვევის პარლამენტს შესაძლოა საკანონმდებლო ინიციატივებითაც მიმართონ:

"ჩემი სუბიექტური აზრია, რომ შრომის კოდექსი დამსაქმებელზე უფროა მორგებული, ვიდრე დასაქმებულზე და იმედია, ამასაც შევცვლით".

პროფკავშირების თავმჯდომარის მოადგილე, გოჩა ალექსანდრია კი საარჩევნო პროგრამებში შრომითი უფლებების მიმართულებით ჩანაწერებს შეეხო. ის აცხადებს, რომ ყველა პარტიის პროგრამა შეისწავლეს და სიტყვები შრომითი ღირებულება, შრომის ინსპექცია, შრომის უსაფრთხოება არცერთხელ, არცერთ პროგრამაში არაა ნახსენები.

"მოიძებნა მხოლოდ შრომითი უფლებების ერთი ჩანაწერი მმართველი პარტიის პროგრამაში და ორი ასეთი ჩანაწერი ბურჯანაძის პარტიაში".

მედიის პროფესიული კავშირის წარმომადგენლები აცხადებენ, რომ საზოგადოებრივ მაუწყებელში დასაქმებულების შრომითი უფლებები დაცული არაა და ისინი შემდეგი მოთხოვნების გარშემო ერთიანდებიან:

  • სამართლიანი სახელფასო სისტემა;
  • შრომის კოდექსით გათვალისწინებული სტანდარტების დაცვა;
  • ზეგანაკვეთური საათების ანაზღაურება;
  • სამუშაო პირობების გამოსწორება;
  • რეორგანიზაციის პროცესში პროფკავშირის ჩართულობა;
  • ხელფასების გათანაბრება;
  • წახალისებისა და პრემირების სისტემის შექმნა;
  • საზოგადოებრივი მაუწყებლის მთავარი პრინციპების დაცვა;

ლაშა მესხი ასევე აცხადებს, რომ მათ მიერ მოთხოვნილი რეორგანიზაციის ჩატარების თარიღი საზოგადოებრივ მაუწყებელში აპრილიდან სექტემბერში და ახლა უკვე სექტემბრიდან დეკემბერში გადაიტანეს. მისივე თქმით, "ამ მხრივ მთავარი პრობლემა კი ტელევიზიაში ისაა, რომ რამდენი ჟურნალისტიცაა, დასაქმებული იმდენივე პროდიუსერია, ოპერატორების რაოდენობა კი კამერების რაოდენობას აჭარბებს".

ამ ეტაპზე მთავარ მიღწევად იმას მიიჩნევენ, რომ მათი მოთხოვნების შემდეგ მაუწყებელში ვისაც ათას ლარზე ნაკლები ხელფასი ჰქონდა, 20 პროცენტით გაეზარდა, ხოლო ათასზე მაღლა - 10 პროცენტით. მთლიანობაში კი, მათი რიცხვი 500 დასაქმებულს შეადგენს.

სამომავლოდ ისინი აქტიურობას სხვადასხვა მიმართულებით გეგმავენ, უკვე დაგეგმილია შეხვედრები რეგიონებში.