გივი თარგამაძის მანქანის აფეთქების ფაქტზე შინაგან საქმეთა სამინისტრო აცხადებს, რომ გამოძიება დამამძიმებელ გარემოებაში განზრახ მკვლელობის მცდელობის მუხლით დაიწყო და უწყების თანამშრომლებმა დაუყოვნებლივ დაიწყეს პირველადი საგამოძიებო ღონისძიების ჩატარება:

"შსს-ს ექსპერტ-კრიმინალისტებმა შემთხვევის ადგილის დეტალურად დაათვალიერეს, მიმდებარე ტერიტორიაზე განთავსებული ყველა სათვალთვალო კამერიდან ამოღებულია ვიდეოჩანაწერები; მიმდინარეობს შემთხვევის თვითმხილველებისა და აფეთქების შედეგად დაშავებული პირების გამოკითხვა, ასევე, აფეთქებული ავტომანქანის გადაადგილების მარშრუტზე არსებული სამეთვალყურეო კამერების დათვალიერება და ჩანაწერების ამოღება; დანიშნულია ყველა შესაბამისი ექსპერტიზა".

შსს ასევე აცხადებს, რომ შეტყობინების მიღებისთანავე, შემთხვევის ადგილზე გამოცხადდნენ შსს-ს ყველა შესაბამისი დანაყოფის წარმომადგენლები.

4 ოქტომბერს, თბილისში, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა აფეთქდა. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. ჯანდაცვის მინისტრის ინფორმაციით, მანქანის აფეთქებისას დაშავებულთა რიცხვი ხუთია. მათგან ერთ-ერთს საავადმყოფოში ოპერაცია ჩაუტარდა.

გივი თარგამაძე დარწმუნებულია, რომ მისი ავტომობილი მართვადი ასაფეთქებლით ააფეთქეს და პასუხისმგებლობას ხელისუფლებას აკისრებს.