საქართველოს რკინიგზაში დასაქმებულები, ხელფასების გაზრდის მოთხოვნით, მასშტაბურ გაფიცვას გეგმავენ. გაფიცვის დაწყების ზუსტი თარიღი ცნობილი 10 აგვისტოს გახდება. რკინიგზელთა ახალი პროფკავშირის წევრები ხელფასების 50 პროცენტით მომატებას ითხოვენ.

პროფკავშირის თავმჯდომარის მოადგილე ილია ლეჟავა აცხადებს, რომ მათ კომპანიას გააცნეს გეგმა, თუ როგორ უნდა მოხდეს ხელფასების ზრდა, დაიწყეს მედიაციის პროცესიც, დაინიშნა მინისტრის წარმომადგენელი ამ პროცესში. მისივე თქმით, რკინიგზის ადმინისტრაციამ უარი განაცხადა მოლაპარაკებებზე.

"ამ ეტაპზე 4 800 ადამიანი არის ჩართული ამ პროცესში ხელი აქვს მოწერილი კონკრეტულად საგაფიცო პროცედურების დაწყების მოთხოვნაზე. პროფკავშირებს ერთადერთი ისღა დაგვრჩენია, რომ ეს პროცედურები ჩავსვათ კანონის ფარგლებში, რომ გაფიცვა იყოს კანონიერი. სამწუხაროდ, რკინიგზის ადმინისტრაცია ჩვენთან კომუნიკაციას არ აწარმოებს", — ამბობს ილია ლეჟავა.

On.ge დაუკავშირდა საქართველოს რკინიგზას და მათ კომენტარს მიღებისთანავე შემოგთავაზებთ.